UCL beiseitu Lyon an chak

Pathianni zan Ligue 1 inkhelah Lyon chuan 2-0 in an mikhual Lorient an hneh a, season thara Champions League khelh an beiseina an chhi nung zel.

Inkhel ṭan aṭangin mualneitu Lyon an hlauhawm nghal a, goal erawh an thun thei lawk lo. Lorient pawhin chance nei mah se goal hmaah an hriam tawk lo a, Lyon keeper Dominik Greif a khelh ṭhat bawk avangin first half-ah goal a lut lo.

Second half-ah Lyon bawk an chungnung zawk a, minute 49-naah Real Madrid aṭanga an hawh, Endrick-a cross chu Roman Yaremchuk-a'n ṭha takin a tauh lut a, a team hma a hruaipui.

Lyon an phur laklawh a, minute sarih hnu lawkah goal an khung leh nghal. Endrick-a shot chu Lorient keeper Yvon Mvogo-a'n a dan per hnuah Corentin Tolisso-a'n goal ruakah a tauh lut a, an hmahruaina a belhchhah.

Goal hnih an chhuah hnuah Lorient-in chance vawi tam an nei a, mahse Greif an paltlang thei lo. Slovakia international hian hun tawp thlengin goal a chhuah duh lo a, Lyon a chhanhim.

Paulo Fonseca enkawl Lyon hi, an match hnuhnung pangaa an vawi khat chakna chiah a ni a, point 51 hmuin an panganaah an awm. An chung chiaha awm Marseille chu point khatin an phâk lo.

Ligue 1-ah match nga chiah khelh tur a awm tawh a, season thara Champions League khelh an tum a nih chuan Lyon tan chetsual a thiang tawh lo.