Spurs-in Robertson dawr mek

Premier League aṭanga tla thei dinhmuna ding mek Tottenham Hotspur chuan Liverpool defender Andy Robertson chu nipui transfer-a lakluh tumin an dawr mek a, Scottish fullback hi season tharah London lamah a pem mai thei.

Kum 32 mi left back hian kar hmasa lawk khan Anfield a chhuahsan tur thu a tichiang a, January-a Robertson lakluh lo tum tawhtu Spurs hian an dawr nawn leh chat.

London club leh Robertson hian inremna chiang tak la nei lo mah se, an inbiakna a kaltluang hle nia sawi a ni a, hetihrual hian Spurs hi EPL-ah an inhamtang a nih loh chuan Robertson hian pan tumna a nei lo thung.

Liverpool tana nomawi chawi theih zawng zawng chawitu Robertson hian Arne Slot hnuaiah hmun a chang phak meuh lo a, tun season inelna hrang hrangah match 32 khel tawh mah se, bench aṭanga luh a tam hle - goal hnih khungin, assist vawi hnih a nei bawk.

Spurs hian Robertson hi a tawnhriat ṭha tak avangin an awhna a zual a, khelmual piah lamah dressing room-ah a ṭangkai theih an beisei - Spurs-in EPL an khel chhunzawm a nih chuan Scotland captain hi Roberto de Zerbi kaihhruaina hnuaiah a khel dawn tihna a ni.