Ghana-in Queiroz la lut

World Cup khel tur Ghana chuan Manchester United assistant manager hlui Carlos Queiroz chu an coach turin an la lut a, kum 73 mi coach hian Otto Addo a thlak dawn a ni.

Ghana hian Addo kaihhruaina hnuaiah World Cup inpetkai mah se, March international break-ah khan Germany leh Austria an ngam loh avangin Borussia Dortmund player hlui hi an ban.

Portuguese coach Queiroz hi coach tawnhriat nei ṭha tak niin, Sir Alex Ferguson-a kaihhruaina hnuaiah assistant coach a ni ṭhin a, 2002-2003 leh 2004-2008 inkarah te khan Old Trafford-ah hian a awm.

Real Madrid leh Portugal pawh lo enkawl tawh Queiroz hian Iran, Colombia, Egypt, Iran, Qatar leh Oman national team te pawh a lo enkawl tawh a, Oman hi a ram enkawl hnuhnung ber niin, World Cup a kai zawhpui loh hnuah a chhuahsan.

Queiroz chuan, "Ka career-a ka lo tih ṭhin tawh angin, ka theihna zawng zawng hlan turin he chona hi ka pawm a ni. Ghana-ah hian talent tam tak a awm a, football ngainatna hmun a ni tih pawh ka hria.

"He ram sulhnu ropui tak leh beiseina te zah tak chungin he hmun hi ka lo pan a ni," a ti. Queiroz hian World Cup 2010-ah khan Portugal chu round of 16 a thlenpui a, Iran chu World Cup vawi thum a hruai thleng bawk.

Ghana hi World Cup-ah group L-ah awmin, Panama, England leh Croatia te nen an awm ho a, USA, Canada leh Mexico te inthlen ṭawm tur inelnaah beisei tihsan a harsa ang.