Arsenal tan tlawm a thiang tawh lo!

Ni e, Arsenal tan tlawm a thiang tawh lo - thla hmasa lawka quadruple champion beisei team hi eng nomawi mah chawi lo thei dinhmunah an ding mek a, Mikel Arteta leh a nauten insiamṭhat an mamawh.

Gunners hian zanin dar 12:30-ah Champions League quarterfinal second leg khel turin Sporting Lisbon an mikhual dawn a, khualmuala 1-0 a an hneh tawh team petchhuah hi UCL tan chauh ni lo, Premier League atan pawh an mamawh tel.

Arteta leh Arsenal hi, "Boruak sang zo lo," tia sawi ṭhin an ni a, he thu dik tawk lohzia tarlan duh ṭhin mah se, a dikna zawk hmuhtir kan ni leh mek tawh - Spanish coach leh a naute tan inthinharh a hun ta e.

Engtin maw?

Gunners hian March thla tawp lamah khan Manchester City chu Carabao Cup final-ah hmachhawnin, 2-0 in an tlawm a, quadruple beiseina mangṭha mah se, "Treble champion kan la ni thei," tiin an inhnem a, nomawi pali zinga hlu lo ber hi an ui lo.

Mahse, Arteta nauten rin loh takin FA Cup quarterfinal-ah Southampton (2-1) an ngam lo zui a, UCL quarterfinal first leg-ah 1-0 in Sporting hneh mah se, hun pek belha goal khung hram an ni a, an ngaih ṭhatna a bo ṭan.

Arsenal fan-ten, "UCL leh EPL nomawi a la awm," an tih laiin, an league match hnuhnung berah Bournemouth chu 2-1 in an ngam lo a, City-in Chelsea an lo hneh bawk si avangin EPL nomawi an kut lehlama an khawih tawha chu an thlah ṭan leh mek.

Inrintawk lohna

EPL-a an nomawi beiseina a nghing a, UCL-ah pawh Arsenal fans an hlauthawng ṭan a, player-te pawhin an inrintawkna an hloh tih loh rual a ni lo - Sporting Lisbon tan tun tluka Arsenal luhchhuahna hun ṭha a awm chuang lo.

Arsenal boss Arteta chuan, "Match kan khelh tam hi chhuanlama hman ka tum lo a, fixture a tawt a nih chuan kan insiamrem mai tur a ni. Nuam ti takin kan inkhel lo a, inkhel thlak danglam kan mamawh laiin theihtawp kan chhuah tawk lo ṭhin bawk," tiin tun hnaia an chetsual chhan a sawi.

Gunners striker Viktor Gyökeres tan mawhphurhna lak ngam a ṭul a, a club hlui laka a goal khung lai fan-ten hmuh an beisei dawn - Declan Rice tan inthlahdah a thiang lo a, Arsenal tan mangchhia thlah a hun e.

Beiseina chu

Arsenal-in 1-0 a Sporting Lisbon an hneh avang ngawta thlamuan a fuh lo. Gunners hi Cherries laka an tlawm avang khan league-ah City-in point ruk chiahin an thlau tawh a, kartawpah an la intawng dawn zui - Arteta tan squad siksawi thiam a ṭul dawn.

Arteta chuan, "Chawlhlawk ang chauh a la ni a, kan ke lehlamin semifinal erawh kan rap ta. Mahse, kan fan-te hmaah chak phawt ila, nomawi chawi chu kan la ngaihtuah ang chu," a ti a, pressure lak kian a tum.

Sporting hian tlarhnungah European club liante awh rawn Ousmane Diomande an nei a, tlarhmaah tun season-a goal 33 khung tawh Luis Suarez an nei bawk - Arsenal tan chetsual theihna an ni.