Ekitike dinhmun a ṭha lo

Paris St-Germain lakah Liverpool an tlawm a ni mai lo a, tun season-a an striker form ber Hugo Ekitike chu hliam vangin lakchhuah a ngai - season thara Champions League khel phak tura tih tur la nei Liverpool tan a pawi thui thei.

Reds manager Arne Slot chuan, "Hugo kha a hliam na khawp mai a, eng ang taka na nge tih erawh sawi theih a la ni lo," a ti a, he thu buatsaih a nih thleng hian Ekitike hliam dinhmun hi a la chiang lo.

Slot chuan sawi zawmin, "Tuna chiang awmchhun chu Ekitike hliam kha a na hle, tih hi a ni. Mahse, chawlhlawkah kan inbe hman lo a, inkhelh zawhah chuan a lo haw tawh bawk avangin engmah a la chiang thei lo," a ti.

Pound maktaduai 82.4 thlenga a man sang chho thei tura Liverpool zawmtu Ekitike hian Reds tan inelna hrang hrangah match 45 khel tawhin, goal 17 a khung tling der tawh a, assist vawi ruk a nei tel bawk.

Kum 23 mi Ekitike hi World Cup 2026 pawh khel lo thei dinhmunah a ding mek tihna a ni a, a khawngaihthlak hle - Reds pawh an vanduai ve bawk a, Alexander Isak a dam chiah a, Ekitike a inhliam ve leh!

Liverpool hi Premier League table-ah pangana an ni a, UCL khel phak chinah an awm rih. Mahse, pangana Chelsea aia an sanna hi point li chiah niin, an dinhmun a la him lo viau.

Reds hian league match 32 khel tawhin, match ruk khelh an la bak a, Pathianni zanah Merseyside derby khelin, an la hmachhawn tur zingah Manchester United, Chelsea leh Aston Villa an la tel bawk.