Mascherano-a'n Inter Miami a chhuahsan

Lionel Messi khelhna Inter Miami enkawltu Javier Mascherano chuan Major League Soccer club hi a chhuahsan a, mimal thil avanga US club chu chhuahsan a nih thu sawi mah se, a hnuaia coaching staff-te pawhin Miami hi an chhuahsan ve nghal vek.

Inter Miami chuan Mascherano nena an inṭhen thu hi puangin, club sporting director Guillermo Hoyos chuan coach lailawk hna a chelh tur thu an sawi bawk.

Mascherano chuan, "Ka chunga rinna an nghah avangin club chungah lawmthu ka sawi a, a bik takin hriatreng tawh tur thawnthu min hnutchhiah puitu player-te chungah lawmthu ka sawi a ni," a ti.

Messi-a ṭhian ṭha, Argentina leh Barcelona tana a khelhpui ṭhin Mascherano hian November 2024 khan Miami hi enkawl ṭanin, national youth team bak la enkawl ngai lo a nih avangin rin a hlawh lo hle.

Mahse, Argentine coach hian Miami hi kum 2025 khan MLS nomawi chawipuiin, MLS club naupang tak tan league-a an champion hmasak ber a ni. Kum 41 mi coach hian tun season-ah erawh beisei a phak lo.

CONCACAF Champions Cup-ah Nashville SC ngam loin, round of 16 aṭangin an tla a, an stadium thar Nu Stadium-ah match hnih khel tawhin, an khingpui an draw ve ve.

Tun season MLS-ah match sarih khel tawhin, vawi thum chiah an la chak a, vawi khat draw neiin, vawi thum an tlawm - Eastern Conference-ah pathumna an ni mek.

Hetihrual hian Miami hian an player pawimawh pahnih Sergio Busquets leh Jordi Alba te chu inkhelh an chawlhsan avangin an nei tawh lo a, club record, dollar maktaduai 15-a an lei, Mexico international forward Germán Berterame-a'n beisei a la phak lo bawk.