East Bengal-in Bengaluru mikhual dawn

Indian Super League inkhel ngaihven hlawhah East Bengal chuan zanin dar 7:30 hian Bengaluru an mikhual dawn a, club pahnih hi champion la beisei ve ve an nih avangin inkhel a hmuhnawm ang.

East Bengal hian match thum zet a zawna an chak zawh loh hnuah Mohammedan SC chu 7-0 ngawtin an sawp a, Chennaiyin lakah 3-1 in an chak leh bawk - an inrintawk vanglai tak a ni a, Bengaluru aia match khata khel tlemin, point 14 ve ve an nei mek.

Bengaluru erawh an league match hnuhnung berah Kerala Blasters chu 2-1 a ngam loin an tlawm a, coach thar Pep Muñoz hnuaia an match hmasa ber a ni - he inkhelah hian 1-0 a hma an hruai laiin midfielder Braian Sanchez chuan minute 34-naah red card a hmu a, player 10-a an khelh hnuah goal hnih an chhuah.

Mahse, Bangalore club hian Braian Sanchez hremna chu sawiselin, AIFF-ah an zualko a, AIFF Disciplinary Committee chuan Bengaluru lungawi lohna chu thutlingah pawmin, yellow card ang zawkin a hremna chu a tihnepsak.

Zaninah Braian a inlan thei ang. Bengaluru hian coach lailawk Renedy Singh hnuaiah khan match sarih an khel hman a, vawi li chakin, vawi hnih draw an nei a, vawi khat an tlawm.

Mahse, Renedy duhkhawp loin Muñoz an la lut a, Spanish coach tan zaninah an tlawm nawn a nih chuan a zahthlak dawn.

East Bengal hian defender Lalchungnunga, midfielder Jerry Mawihmingthanga, Lalramsanga, Vanlalpeka Guite, striker David Lalhlansanga leh forward Edmund Lalrindika te an nei a, Edmund hi a 'form' vanglai tak a ni.

Lunglei tlangval hian an league match hnuhnung berah khan goal a khung a, tun season-ah league match sarih aṭangin goal thum leh assist vawi hnih a nei tawh.

Bengaluru-in keeper Lalthuammawia Ralte leh midfielder Lalremtluanga Fanai an nei a, Tluangtea hi zaninah bul ṭan leh ngei tura beisei a ni - match riat an khelh tawhah la inlan vekin, assist vawi hnih a nei tawh.