FIA-in Red Bull leh Mercedes 'engine trick' a khap
F1-a chakna tura qualifying-a Mercedes leh Red Bull hman ṭhin 'qualifying trick' chu FIA chuan a khap tih a puang. May thlaa neih tur, Miami Grand Prix practice aṭangin hman phal a ni tawh dawn lo.
He thil siamchhuaktu team pahnihte hian motor battery-in chakna a hman zawh dawn hnaiah, chakna tihhniam dan bituk aia sang hman dan thiam tak an lo hmu chhuak. Qualifying lap a zawh dawn hnaia chakna tihhniam - second khat zela 50kW zela tihhniam tura ruahman aiah theihtawpa chakin an tlan tlang tir char char thei.
Team dangin power an tihhniam mek laiin, anni erawh chuan hun tawite chhungin 50kW aṭanga 100kW vela nasa zawkin chakna an nei thei a ni. He thil hi second khat, hmun zaa ṭhena hmun tlemte chauh pawh ni se, tlan ṭan hun tura dinhmun inchuhna kawngah chuan a ṭangkai hle.
Japan Grand Prix atana practice an neih lai khan, Mercedes driver Kimi Antonelli leh Red Bull driver Max Verstappen te chuan Suzuka Esses-ah chakna (power) an neih loh avangin an buai dun hle.
Williams driver Alex Albon phei chu he thil vang hian practice-ah a motor a dinpui hial. Kum 2026 season hawnna Melbourne-ah pawh khan, driver-ten practice lap simulation an neih zawha an tlan muang ta thut kha he thil nen hian inzawmna a nei tih hriat nghal a ni lo.
China-ah erawh kawi hnuhnung ber aṭanga line inkar a tawi deuh avangin he trick hi an hmang lo thung. Japanese GP zawhah FIA chuan Suzuka-ah khan manufacturer-te chu an be pawp a, MGU-K trick hman kha dan phal loh ni chiah lo mah ni se, he trick hi motor-in harsatna a neih loh nan leh lap an zawh hma thlenga an buai loh nan team-ten, fimkhur takin ruahmanna an siam a ngai tiin an hrilhfiah ta a ni.
Australia-ah he trick hi hmang an awm tih hmutu manufacturer dangte chuan, an tih ve zel a ngai dawn em, tih an lo ngaihtuah ve mek a. Ferrari chuan he thilah hian fiahna duhin FIA an be pawp nghal a, a dante chu phal loh ni chiah lo mah se, he thil hman hian driver te tan thil hlauhthawnawm tak a thlen theih avangin, hman phal chiah an ngai ta lo a ni.