Iraola-a'n Bournemouth a chhuahsan dawn

Premier League club Bournemouth coach Andoni Iraola chuan Bournemouth chhuahsan turin thlutlukna a siam a, tun season bak Bournemouth a enkawl tawh dawn lo. Spanish coach hian tun season daih chiah contract a nei tawh a, club hotuten a contract pawhsei tumin hma la mah se chhuah a thlang ta zawk. Iraola hma hun hriat ni lo mah se, player a nih laia a lo khelh tawhna Athletic Bilbao hming a ri ring hle.

Kum 43 mi Iraola hian Bournemouth hi June 2023 khan a enkawl ṭan a, club chairman Bill Foley-a'n manager ni lai Gary O'Neil a ban thut avangin Iraola hian a enkawl a, hetihlai hian rin a hlawh lo hle.

Mahse, Iraola hian amah ringhleltute ka a hupsak a, a season hmasa berah 12-na a nihpui a, season hmasa khan pakuana a nihpui bawk a, point 56 hmuhpuiin Bournemouth-in Premier League season khata an hmuh hnem ber ṭum a ni. Player lakluh bakah a neih sa a hman thiam avangin a lar phah hle.

Cherries hian Spanish coach hnuaiah inelna hrang hrangah match 121 an khel tawh a, vawi 45 chakin vawi 41 an tlawm a, vawi 35 an khingpuite nen an inhnehtawk. Tun hnaiah match 12 chhung tlawm nei loin an kaltluang mek a, Premier League match ruk khelh tur la awmah, Iraola hoin an record hi chhunzawm zel an tum ang .

Iraola-a'n Cherries a chhuahsan dawn tih a chian veleh Crystal Palace an lo lang ve nghal a, Palace hi an boss Oliver Glasner-a'n season tawpah a chhuahsan dawn avangin, anmahni enkawl turin Iraola hi an duh. Eagles enkawl turin Sean Dyche hming ri mah se Iraola hi an duh zawk niin sawi a tam hle.

Hetihlai hian Iraola hi a club hlui, Bilbao lam a awn ber a, Spanish club hi season tawpah Ernesto Valverde-a'n a chhuahsan ve dawn bawk avangin Iraola-a'n a enkawlna chance a sang hle. Iraola thlak tur hian RB Leipzig coach hlui, Marco Rose hming a ri bawk.

Bournemouth hi Premier League table-ah 11-na an ni mek a, mahse parukna Chelsea nen point thum chauhin an inthlau. Match ruk khelh tur la awmah season thara Europe-a inlan thei turin beiseina sang tak an nei.