Inter-ah Calhanoglu a hlim

Hakan Calhanoglu-a agent, Gordon Stipic-a chuan a player chungchanga Galatasaray leh Inter inkara thuthang awm chu a tichiang a, Calhanoglu chu Inter-ah a hlim thu a sawi.

Stipic chuan, "Thuthang mai mai hi chu ka chhang ngai lo a, mahse tun ṭumah erawh hi chuan thu dik tak tarlan hi a pawimawhin ka hria. Calhanoglu hian kum 2027 thleng Inter Milan-ah contract a nei a, Italy-ah leh Inter-ah hian a hlim hle a ni," a ti.

"Galatasaray-a a insawn tur chungchang hi tun hma aṭang khan a lo chhuak fo tawh a, tunah an rawn tharthawh leh a ni. Mahse, thudik erawh chu hei hi a ni. Nikum nipui lai leh January khan Galatasaray nen inbiakna engmah kan nei lo. Engtik lai mahin biakna emaw, dilna a awm ngai lo.

Calhanoglu-a hi Inter Milan-in Serie A title lak an tumnaah rilru a pe a, June thlaa neih tur World Cup chu beiseina sang tak nen a thlir bawk. World Cup-ah a ram captain a ni dawn a, he mawhphurna hi a tan chuan chawimawina hlu tak leh a engkim a ni, a ti.

Turkish midfielder Calhanoglu hi tun season-ah Inter tan a che ṭha a, Serie A-ah match 26 khelin goal kua a khung tawh a, assist pali a nei tawh bawk. Hliamin tibuai leh zeuh ṭhin mah se a thiam ngaiin a thiam reng a, Serie A bakah Coppa Italia-ah champion beiseina sang tak a nei mek.