Crystal Palace innghahna Mateta

Crystal Palace chu zaninah Conference League quarterfinal khel turin Italy-ah an zin a, dar 12:30 hian first leg-a an hneh tawh Fiorentina nen second leg-an khel dawn. Palace tan an forward Jean-Philippe Mateta chu an innghahna a ni leh dawn.

Tun season-ah Mateta hi hliam vang leh, club-ah a lungawi loh avangin a khel tam lo. First leg ah pawh Mateta hi bul ṭan tura dah a ni lo a, mahse, hrem vanga Jorgen Strand Larsen a khelh theih loh avangin Fiorentina lakah bul a ṭan a, chumi hnuah Newcastle lakah substitute-in a lut leh a, goal khung ve vein a hun ṭha neih a chhawr ṭangkai hle.

French forward hian game hnih chhungin goal thum a thun tawh a, Crystal Palace player man to ber Jorgen Strand Larsen aiin coach Glasner-a'n a duhsak tawh zawk nia sawi a awm. Mateta che ṭha hi season tluan deuhthawa tlarhma lama duh thlan tur pakhat chauh buai Eagles tan thu lawmawm a ni.

Mateta hian Eagles tan Goal 59 a thun tawh a, club chanchina goal thun hnem ber 16-na a ni mek. Tun season Premier League-ah goal 10 a khung tawh bawk a, Wilfried Zaha hnua top-flight season hrang pathuma goal 10 leh a aia tam thun thei player awmchhun a ni.

January thla khan Mateta hi Serie A lamah a insawn hman ṭep a, chhuah a duh thu ualau taka a tihlan avangin Palace fan-te Mateta chungah an lungawi lo hle. Mahse tunah chuan goal hmangin a laka thinrimte a beng dai chho mek a, zaninah pawh fan te lawmna turin goal khung a tum leh ang.