Chanmari FC dinhmun tur a hriat dawn

Indian Football League-ah vawiin tlai dar 4:00 hian Chanmari FC-in Namdhari an tlawh dawn a, Mizo club hian Punjab club hi an hneh thei a nih chuan Championship Playoff khel thei dinhmunah an ding dawn. Chutihrualin Dipankur Sharma hote hi an chak zo lo a nih chuan relegation playoff an khelh a ṭul thung ang.

Hmun ruak pahnih

IFL-ah team 10 an tel a, team parukin champion tur zawnna Championship Playoff an khel ang a, pali dangin relegation playoff an khel dawn. Match khat chauh khelh tur a awm tawh a; Diamond Harbour, Sreenidi Deccan, Rajasthan United leh Shillong Lajong te Championship Playoff khel turin an dinhmun a chiang tawh.

Hmun ruak pahnih la awm hi Dempo SC, Aizawl FC, Chanmari FC, Gokulam Kerala leh Namdhari ten an inchuh dawn. Mizo club pahnihte hian match tawp bera hnehna an chang a nih chuan C'ship Playoff khel turin kawng a la inhawng zau. Chanmari FC hian Namdhari an hneh a nih chuan panganaah an awm lailawk ang a, inkhel dang result an ngaihchan erawh a ṭul thung ang.

Dinhmun fiahna

Mizo club khingpui tur Namdhari hi tun season-ah vawi khat chiah an la chak a, chutihrualin ṭum li lai an khingpuite an chelh. Punjab club hian tun season IFL hmasa berah Aizawl FC an chelh thei a, point thum mamawh Chanmari tan Namdhari Stadium-a hnehna chan hi a awlsam dawn lo.

Punjab hian an mualah a zawnin match hnih an khel tawh a, zin chhuak loin Mizo club hmachhawn turin inpuahchahna hun ṭha an nei tihna a ni. Chutihrualin Namdhari hian match hnuhnung pahnihah Diamond Harbour leh Shillong Lajong an hneh lo ve ve a, Mizo club pawhin hnehna chan ngei an tum dawn.

Chanmari hian match hnuhnung berah Diamond Harbour 3-1 in hneh lo mah se goal an khung hmasa a, league hmahruaitu nen an inkhel tawk hle. Dipankur Sharma kaihhruaina hnuaiah khualmualah Real Kashmir an hneh tawh bawk a, hei hian inrintawkna a pe ang.

Mizo club-in goal an mamawh avangin tlarhma lam an pawimawh dawn a, match hnuhnung pahniha goal khung ve ve tu erawh Brazilian defender Marlon a ni daih. Goal venhim kawngah Marlon tan hmasawnna tur a awm a, tlarhma lam player Christopher Kamei, Jota, KC Malsawmsanga, Aron Vanlalrinchhana leh Lalruatsanga ten an theihna sang tak an lanchhuahtir a ṭul dawn a ni.