Silly Point: The GAFFER

Sakawr chu luiah i hruai thei, a tui erawh amah ngeiin a in a ngai

TATA Indian Premier League 2026 lamah inelna hmasa ber- 2008 kuma champion Rajasthan Royals-in bul an ṭan ṭha hle mai a. Kumin kumtir maia billionaire Kal Somani a lei chhawn RR team hi, motor engine thar ang maiin an vung nghal a, chuta an fak chamchi chu an support staff Kumar Sangakkara leh a hote hi an ni.

Kumin season kan hman zawh takah Mizoram Cricket-in hma nasa takin a sawn a, kum danga thil thleng ngai lo BCCI Trophy nomawi pathum lai mai kan han chawi ṭhawt a, final thlen lah kan nei nual. Hetah hian a pawimawh ber chu a taka va che player-te an ni a. Tin, administration lam khawihtu association an bang thei lo a. Mahse, chumi inkar lei dawh leh mawhphurna lian tak chang tute coaching staff leh support staff kan tih te hi a ni lo thei lo ang.

Cricket & Coach

Cricket leh a bik takin professional cricket hi chu captain thuneihna hnuaia inkhel a ni a. Cricket khawvelah hian coach mumal tak rawn awm ṭanna chu 1980s chhoa Australia ho rawn chin ṭan kha a ni mai awm e.

Hma nasa taka an sawnna chhan pawh kha a ni reng a ni. India-in World Cup 1987 an thlen ṭuma Australia team, an champion ngawtna chhan pakhat zingah an sawi chu Bob Simpson, an coach kha ni tlat. India cricket team-in coach mumal tak a neih ṭanna chu 1991-a Ajit Wadekar an rawih aṭang khan a ni a. Hemi hma zawng hi chuan team practice, discipline leh engkim kha captain leh manager ten mawhphurhna an la mai ṭhin. Chutihrual chuan team enkawl ni lem lo, academy leh cricket zirna hmunpuiah erawh coach hi chu hmakhawsang aṭangin an lo awm tawh ṭhin a ni.

Raj Sing Dungarpur a khawthlir

Khati hun laia BCCI President khan, khawthlang lam Australia, England leh South Africa ten nasa takin hma an sawn leh Cricket khawvela an fal bik dan (advance) kha hre rengin, heng ram ho aṭang hian inzirin Bangalore-ah kum 2000 khan National Cricket Academy chu an han din ve ta a. India cricket lahin hma a sawn narawh e. NCA thil tum pathum chu players ṭha zawk, coach ṭha zawk cherchhuah leh inhliamte enkawlna ṭha pek a ni.

Chu NCA ngeiah pawh chuan he thuziaktu ngei hi vawi duai lo zirlaiah ka lo ṭang ve ta fo mai a. Level 2 coach certificate ngaihhlut hlawh tak mai chu hruatute duhsaknain ka paltlang ve hlauh a, a sang Level 3 bei ve thei tura refreshers course te nen kum upat lamah pawh kan chil a la put ta zel zawng a nih hi maw.

Master teach mi Cricket

Chinese kung fu film ṭawng lehlina 'Master teach me Kung fu' an tih fo iangin Mizoram cricket-ah pawh hian coach engemawzat kan lo awm ve ta reng mai. Academy leh sikul a ṭhahnem ngai tak a, a bul ṭhut aṭanga zirtirna pe tute. Pa leh u chanchang ngaihna, age group-a state team coach leh support staff te. Tin, a upa lam leh professional team enkawl tute. TV lama kan lo hmuh fo ṭhin India team, IPL team te leh Ranji Trophy team lian ṭhenkhat hi chuan support staff kan tih hi 10 aṭanga 20 dawn dawn an nei nghe nghe a ni.

Support staff hian head coach, asst coach, bowling coach, batting coach, fielding coach, fitness coach, physio, video analysis, performance coach leh mental conditioning coach te a huam vek a, thailang seng vek sen a ni lo ang.

Inkhelh laia Football te anga thuneihna leh hnar kaitu angin cricket ah chuan coach-te hi an ni chiah lo a, lawn Ttennis anga coach te hi engmah ti thei lo ang a ni chiah hek lo bawk. A sap ṭawng takin 'passively active coach' hi cricket-ah chuan coach te chanvo an tih hi a lo dik dawn hle a ni..

Ka tawnhriat

Professional Cricket ka retire hnuah coach certification hrang hrang leh mimal a zir theih ang ang te CAM & BCCI duhsaknain kan han zir ve a. Kum liam ta khan ka chan loh khanah malsawmna dawngin Professional team ber enkawl tur zingah hotuten min han duhsak thut mai a. Ka tan chuan meialh hmanga baptisma a ni.

Min hrual turin India ramah chuan coaching-a kum 30 dawn tawnhriat lo nei tawh Ramalingam Srikant a awm a. Support Staff-ah lah USA team thlenga lo enkawl tawh Parmeet Singh leh under 19 level aṭanga tuna kan naute lo hrual tawh Shabaz Mansuri (Strength & Conditioning Coach) a tel bawk.

Professional team dang angin ngah ve duah lo mah ila, kan manager Kraws-a'n min uap tlat nen, ka va inzir nasa tak em. A hnung ka zui ber head coach Ramalingam Srikant hi a vanglaia ball vawm thiam leh India rama bowler te coaching pe thiam zinga hming lo chher tawh a ni bawk a. Chik takin a che ka en a, thil tam tak ka zawt a, hma ka va han sawnpui tak em!

Hruaitu ropui chuan hruaitu dang an chherchhuak ṭhin

Ka hnungzui Srikant a hian thil tamtak min fah leh kawhhmuh bakah, min fuihna leh hma ka sawn theihna tur min kaihruaina te ziah vek sen a ni lo. Amaherawhchu, ani fuihna tawngkam hnih khat lek ka nun thlak danglam tute hi ni ropui ka ti.

"Ruata Coach puitling ṭhahnem tak hi ka lo hrual chhuak tawh, chung zingah chuan i tel ve ngei ang" tia mi a rin derna ngamna chuan chona nasa zawk min siam a. "I career-ah batsman i ni a, batting nghat phei chu he team leh player enkawlah hian mawhphurna i kutah ka hlan ngam che," tia min fak derna leh mawphurna min pek ngam avangin keimah ngei pawhin inrintawkna ka ngah phah a, hma ka sawn phah bawk.

Team meeting-ah lah ka thil hmuh, ka ngaihdan etc leh a chang phei chuan khaikhawm turin, a rank pui ang maiin min dah thiam a, chutihrual chuan Val Upa zawk na na na leh a taka fawng chelh tu chuan engkim a hunah a khaikhawm thiam lawi si. Inzir hian tawp chin a nei ngai dawn lo a, kan thih ni thleng hian hmasawn zel tur kan lo nih ngei dawn hi.

Tlipna

CAM hruaitute duhsaknain NCA lama min lo zirtirtu ṭhin tute, head faculty (India hmeichhia & Under 19 team World Cup-a champion puitu) Apurva Desai leh bowling faculty Sanjay Mullesery ten kar liam ta khan ni hnih chhung refreshers course min rawn neihpui a.

Hemi ṭuma kumina India cricket team coach Gautam Gambhir-a kaihruaina hnuaiah NCA lama ral an lo rel dan ropui lutuk mai min han fah hi a ni min ti ṭhangharh tu chu ni. India team khan Abhishek Sharma hmangin ball khatna aṭangin ball hlap nghal tur a ni a, an bowling rem dan pawh an duan ang chiah a ni.

Tournament tirah Abhishek Sharma a duck out zawn zak zak a nih kha. Media leh India ram mipui sawisel an hlawh. Amaherawhchu plan mumal taka ral lo rel tawh tute chuan an tum ram an hria, chu Abhishek Sharma ngei chu tournament tawp lama India rawn chakpuitu kha a ni leh lawi si a nih kha maw. Hetah hian kaihruaitu kan nih angin coach te hi luhlul luih leh nem loh, u leh pa chan chang lawi si, mi paukhauh leh principle nei nih a ngaih zia min zirtirna a ni ber. Ka va han hlawkpui leh si em.

Apurva Desai a thu min chah hmang hian tun ṭum kan thuziak chu khar mai ang. "Coach te hi a ṭha ber ka ni lo. Kan player-te hi keini aiin an thiam daih zawk ang. Mahse, thildang hmanga neih ve theih loh kan tawnhriat ( experience) hmangin player leh team te hi nitin a aia tha zawk, nimin aia hmasawn leh hret tura hrual thei tute awm chhun kan ni," tiin coach te tana thu pawimawh min fah.

Mizoram Cricket hlawhtlinna chhan kan player-te leh CAM lama puipate leh committee hrang hrang hruaitute chibai buk pahin, a phena lung pawimawh ka coach puite zahna chibai ka buk thar leh a che u.