Vawiin aṭangin Swimming C'ship

Aquatics Association of Mizoram buatsaih Mizoram Inter School & Open Swimming Championship vawi riatna chu vawiin aṭangin Aquatic Complex, ITI Veng-ah neih a ni dawn a, inelna hian ni hnih a awh ang.

Inelna hi Mizoram States Sports Council (MSSC) thlawpna hnuaia neih tur a ni a; sub junior, junior, senior leh open-ah te inelna neih tur a ni. Tun ṭum inelnaah hian chhinchiah danin swimmer 120 an tel dawn a, school 25 aṭangin naupang 98 bakah open inelnaah swimmer 22 an tel ang.

Aquatics Association of Mizoram chuan tun ṭum inelna tur atan hian sum ṭhahnem tak sengin Aquatic Complex-a pool pawh an tifai a, tui a fim ṭhat avangin chhuat thlengin a hmuh theih vek a, inelna pawh a hlut phah sawt ang.