Hugo Ekitike tan season a tawp

Liverpool striker Hugo Ekitike chu tun season-ah a inkhel thei tawh dawn lo a, World Cup-ah pawh an ram France tan a feh chhuak thei dawn lo - kum 23 mi striker hi a khawngaithlak takzet.

Ekitike hi Thawhlehni zan Champions League quarterfinal second leg-a Paris St-Germain nen an inkhelh ṭumin a inhliam a, zawnchhuah a ngai hial. Liverpool boss Arne Slot-a'n a player dinhmun a sawi theih rih loh thu inkhelh zawhah a sawi a, tunah erawh engkim a chiang ta.

Hetihrual hian Liverpool erawhin he thu buatsaih a nih thleng hian thuchhuah an la nei a, World Cup-a a inlan theih loh tur thu pawh hi France manager Didier Deschamps-a'n French Football Federation kaltlanga a puanchhuah a ni.

Deschamps chuan, "Hugo-a'n PSG nen an inkhelh ṭumin hliam na tak a tuar a, a hliam nat em avangin Liverpool tan season a khar thei dawn lo a, World Cup-ah France tan a feh chhuak thei dawn lo bawk," a ti.

France coach chuan sawi zawmin, "Hugo hi tun hnaia France tana an match hmasa ber khel player zingah a tel a, national team tan khelmual chhung leh pawnah a ṭangkaiin, nuam a ti em em a, hetianga a inhliam ta mai hi, ama tan mai ni lo, France tan a pawi takzet a ni," a ti a, World Cup-a Liverpool striker a hruai thei lo tur chu pawi a tih thu a sawi.

Nikum September-a France tana a match hmasa ber kheltu Ekitike hian nikum July thla khan Eintracht Frankfurt aṭangin Liverpool hi a zawm a, a man pawh pound maktaduai 82.4 thlenga sang chho thei tur a ni.

Reds-in tun season-ah beisei phak lo mah se, Ekitike erawh Liverpool tan inelna hrang hrangah match 45 khel tawhin, goal 17 a khung bakah assist vawi ruk a nei tel - UCL khelh phak tum Liverpool tan a inlan thei rih lo tur hi chânna a tling.

Deschamps chuan, "Hugo hian hrehawm a ti hle. Mahse, a dam ang a, ṭha takin a khel leh thei ang tih hi ka ring tlat. Kei leh ka staff te chuan kan duhsakna sang ber kan hlan a, kan rilruah kan hre reng," a ti a, a striker chuan in lam aṭangin France a lo thlawp tur thu a sawi.

Ekitike khelhna club Liverpool hian hliam an ngah hle. Alexander Isak a dam chauh a, Ekitike a inhliam leh a, centre back Giovanni Leoni leh full back Conor Bradley te chu season tawp thlenga inlan thei lo tur chiang an ni a, keeper Alisson Becker leh midfielder Wataru Endo te pawh an la chawl mek.