Terry-a'n Colchester a lei dawn

Chelsea defender hlui John Terry chuan League Two club Colchester United lei turin hma a la mek a, Terry leh Colchester te hi an inhnaih tawh hle niin khawthlang chanchinbuten an tarlang.

Thawhṭanni khan Colchester United chuan an club lei tuma thawkho pawlte nen inbiakna an neih mek thu an puang a, mahse a leitu turte hming erawh tarlan an la duh rih lo thung.

Mahse, Colchester lei duh pawl leh Terry te hian inzawmna an nei ngei a, Terry pawh hian Thawhlehnia Colchester-in Accrington an hnehna inkhel kha a hmunah a en.

Colchester hi nikum aṭang tawh khan lei duh an awm tawh a, mahse a lei duhtu pahnih nen inbiakna a tlawlh ve ve a, fans-in tun nipui transfer bazar inhawn hma ngeiin neitu thar an duh tawh hle.

Blues legend Terry chuan, "Manager hna thawk turin interview vawi eng emaw zat ka lo hmachhawn tawh a, mahse manager tak tak anga tawnhriat ka la neih loh avangin lak ka ni ngai lo.

Amaherawhchu, Chelsea leh kan ram tan captain ka lo ni tawh a, midang enkawl leh kaihhruai kawngah chuan kha aia ṭha kha a tih theih tawh pawhin ka ring lo. Kei chu ka inpeih reng a, ka inhuam bawk a ni. Hnehna chan reng duh an zawng a nih chuan kei aia ṭha zawk an hmuh kher ka ring lo," a ti a, Colchester-ah club neitu zinga a tel theih chuan hmasawnpui theih a inring hle.

Kum 45 mi Terry hian 2018-a inkhel a chawlhsan hnuah football-ah a la inhnamhnawih reng a, Aston Villa-ah Assistant manager hna a thawk tawh a, 2021-a Villa a chhuahsan hnuah 2022 khan, Chelsea academy a enkawl leh a, season hnih chhung a enkawl hman.