UEFA hnenah Barcelona zualko dawn

Spanish club lian Barcelona chu Champions League quarterfinnal first leg-a, Atletico Madrid nen an inhmachhawn ṭuma referee thutluknaah an lawm lo a, UEFA hnenah an lungawi lohna an thlen dawn.

First leg-a team pahnih inkhelah Atletico defender Marc Pubill chuan Atletico goalkeeper Juan Musso-a'n goal kick aṭanga ball a tihnun hnuah a kutin a khawih a, Barca player te chuan penalty hmuh an beisei. Mahse referee Istvan Kovacs chuan penalty a a pe lo a, VAR a inrawlh lo bawk.

He thil hi Julián Álvarez-a freekick hmanga Atletico-in 1-0 a hma an hruai hnua thleng a ni a, he goal hi Pau Cubarsí-a foul vanga lut a ni a, Cubarsí hi referee-in red card pein a hnawtchhuak nghal. Alexander Sorloth-a'n an goal hnihna a khung leh a, Diego Simeone-a naute hian 2-0 in hnehna an chang. Second leg-ah Catalan club hi 2-1 in chak mah se aggregate-ah 3-2 in an tlawm a, UCL aṭangin an tla.

Barca president Joan Laporta chuan, "Atlético-in semifinal an luh avangin ka lawmpui a, mahse referee leh VAR thutluknate kha pawm a harsa. An thutluknate khan UCL quarterfinal-ah nghawng nasa tak an nei tih a chiang hle.

First leg-ah khan penalty turah engmah pek kan ni lo a, Cubarsi-a foul-ah khan yellow card pek tur ni awm takah red card min pe bawk. Second leg-ah Eric García-a red card pek kha a dik lo hle. Koundé kha ball chang thei turin a awm hnai reng a, Eric kha 'last man' a ni lo.

Ferran Torres-a goal hnihna an pawm lo kha a dik lo a, Dani Olmo lakah khan penalty a awm bawk. Fermín Lopez-a hmai phei chu a kak hial a, mahse, referee khan yellow card pawh a pe lo.

Hetiang hi thil hi kan pawm thei lo a, kar hmasa khan UEFA hnenah complain kan thehlut tawh a, tun hnaiah kan thehluh nawn ka beisei. Tupawh 'Barcelona hian referee te lak atangin duhsakna an dawng ṭhin' titu chuan thil an hrechiang lo a ni" a ti a, referee thutluknaah an lungawi lo hle.

Hansi Flick-a naute hi UCL aṭangin tla tawh mah se, La Liga-ah hmahruaitu ni mekin, champion turin dinhmun ṭha takah an awm tawh. Spanish Super Cup-ah an champion tawh bawk avangin title pahnih chawiin season an la khar thei.