Maguire-a'n Chelsea hmachhawn thei dawn lo

Manchester United defender Harry Maguire chu, thla hmasaa Bournemouth nen an inkhelh ṭuma red card a hmuh avanga an hremna chu, match khat atan Football Association chuan an belhsak a, Pathianni zana Chelsea an hmachhawn hunah a inlan ve thei dawn lo.

English defender hi March 21, Zirtawpni zana Cherries nen an inkhelh ṭumin Cherries forward, Evanilson lakah a foul a, red card pek a ni. Ground a chhuahsan dawnah Maguire hian fourth official Matt Donohue lakah ṭawngkam mawi lo a hmang a, match khat an hrem belh bakah pound 30,000 an chawitir tawh bawk.

FA chuan Maguire hian red card a hmuh hnuah midang hnuaichhiah zawngin ṭawngkam a hmang niin an sawi a,

fourth official chunga a khawsak dan leh ṭawngkam mawi lo a hman avanga hrem an nih thu an tarlang.

Kum 33 mi Maguire bakah hian Lisandro Martinez chu United-in an chân dawn bawk a, Argentine defender hian Thawhṭanni zana Leeds United an hmachhawn ṭumin Dominic Calvert-Lewin a samah a pawt a, tharum thawhnaah ngaih a nih avangin red card a hmu a, Stamford Bridge-ah a inkhel ve dawn lo.

United hian tlarhnungah duhthlan tur an ngah lo a, Maguire leh Martinez bakah Matthijs De Ligt chu inlan lo tur chiang sa a ni a, kum 19 mi Ayden Heaven leh kum 20 mi Leny Yoro te chauh an awm dawn a, rawlthar pahnihte tan hna a awlsam dawn lo.

Michael Carrick-a naute hi Premier League table-ah point 55 hmuin, pathumnaah an awm mek a, an match hnuhnung bera an chak loh avangin an hnuai chiaha awm Aston Villa nen an point hmuh zat a inang.

Man United hi an chak lo nawn a nih chuan Villa-in an lehpelh theih tawh bakah, Chelsea nen an inkar a zim sawt dawn.