Domenicali-a'n driver te F1 thutlukna zah turin a duh

Formula 1 CEO Stefano Domenicali chuan dan thar an hman ṭan mek an sawiselnaah, driver ṭhenkhat hriatthiamna a ngen a, Max Verstappen chu inelna hi zah turin a duh bawk.

Verstappen hi FIA-in dan thar an siam duh lotu zinga langsar ber pawl a ni a, vawi tam tak lo sawisel tawhin engine tharin mamawh a ngah ta lutuk chu a lo sawisel tawh. Dutch driver chuan Chinese Grand Prix an tlan zawh khan, an dan thar hman chu 'âtthlak' tiin a lo sawi tawh.

Domenicali chuan, "A thil sawite hi ka hrethiam a, ani pawhin thil thui zawk a thlir tih ka hre bawk. Kei chuan inrem lohna a awm ka duh lo. Kan la thawk ho zel dawn a, ani hi driver ṭha tak a ni a, world champion vawi tam tak lo ni tawh a nih avangin a thusawi hi ngaihthlak ngei ngei tur a ni.

Mahse, a thil sawi ṭhenkhat kha mi tam takin an la kawi thei a, chutiang thil chu a thlen kan remti lo. F1 mai bakah driver-te zahawmna a tihchhiat theih avangin insum deuh a ngai.

Tun dinhmun thleng turin thil tam tak kan paltlang tawh a, he infiamna hian mihring nun a thlak danglam bakah, sum tam tak min hlawh tirtu leh khawvel huapa mi nun dan thlaktu a ni a, chutiang thil chu infiamna dangin a thlen theih ve loh a nih avangin kan zah thiam a ngai," a ti.

F1-in bung thar a kai a, F1 hi FIA-in a lo tih ṭhin danin car regualtions a thlak thar kum a ni a, tun thlasik khan thil lian tham tak an thlak nual a. 2026-a hman ṭan turin car bakah engine leh a ke thlengin an thlak vek. Thil thar an duan hi Australian Grand Prix, Melbourne-a neihah khan an hmang ṭan.

Rules thar a chhuah aṭangin sawiseltu zingah Verstappen bakah, Lando Norris pawhin Australian GP chu an intlansiak tawha nuam lo a tih ber ṭum niin a lo sawi tawh bawk.