Rinzuala'n NorthEast United a chhanhim

Nilaini zan Indian Super League inkhelah Lalrinzuala'n NorthEast United a chhanhim a, Kerala Blasters laka tlawm tur kha point khat a hlawhchhuahpui a, 1-1 in an inhnehtawk.

Ashley Westwood kaihhruaina hnuaiah Blasters-in harhtharna an chang a, Bengaluru laka 2-1 a chak hlim an nih avangin inrintawkna pawh an nei.

Mikhual Highlander lakah pawh Blasters hian minute 41-naah goal hmahruai an khung - Fallou Ndiaye-a overhead kick chu Parthib Gogoi chuan lo dang mah se, a per lehlam hian Andy Rodriguez perin, goal-ah a lut daih!

Blasters-in goal hmahruai an khung a, mahni muala inkhel an nih bawk avangin an inringtawk hle. Mahse, minute 64-naa bench aṭanga luhtir Lalrinzuala'n danglamna a thlen a, Serchhip striker hian hun tawp nan minute hnih chiah a awm tawh tihah Highlander tan si phurh sutna goal a khung.

NorthEast United tan Macarton Luis-a'n Ankith Padmanabhan tana ball thlawh luh a tum a, hei hi Blasters keeper Arsh Shaikh chuan tlan chhuakin, a lo tauh chhuak - he ball per hi Robin Yadav chuan bar a tihper leh!

Mahse, a per lehlam chu Rinzuala ke bulah tlain, Aizawl FC striker hlui hian goal-ah a chantir a, NorthEast United tan point khat hlu tak a hlawh chhuak - ISL-a a season hmasa berah match sarih khel tawhin, goal hnih leh assist vawi hnih a nei ta.

Blasters tan Freddy Lallawmawma-a'n inkhel bul ṭanin, goal khung theihna remchang a neih a chhawr lo a, Highlander tan Rinzuala bakah Lalbiakdika (BD-a) chu bench aṭanga luhtir a ni.