Premier League club-ten Kvaratskhelia an duh

Paris Saint Germain forward Khvicha Kvaratskhelia chu Premier League club lian ten an duh a, a duhtu zingah Liverpool an langsar hle. Inṭhuahfai tum Liverpool hian nipui transfer bazar inhawn hunah Kvaratskhelia hi lak luh an tum ang.

Napoli aṭanga PSG a zawm hnuah Kvaratskhelia a che ṭha chhunzawm a, season hnih a awm chhungin player pawimawh a ni phak. Tun season-ah pawh inelna hrang hrangah match 40 khel tling tawhin, goal 13 a khung tawh.

Tun hnaiah Kvaratskhelia hian duhtu a ngah zual a, Liverpool chu a langsar ber an ni. EPL club lian zingah Manchester United, Arsenal leh Chelsea te hming ri ve bawk mah se Liverpool hming a ri ring ber.

Mahse Reds tan Georgian forward lak chhuah hi a awlsam dawn lo a, an neih sa an paih ṭhen bakah sum tam tham tak an thehchhuah tel a ngai dawn. Kvaratskhelia hian June 2029 thleng contract a nei a, PSG player pawimawh a nih bawk avangin, pound maktaduai 80 tal insen an huam a ngai dawn. Reds hian Newcastle United forward Anthony Gordon an duh tel bawk avangin, Kvaratskhelia lak chhuah a har sa mai thei.

Pathianni zan dar 12:15-ah PSG-in Lyon an mikhual dawn a, Kvaratskhelia hi a inkhelh ngei a rinawm. PSG hian match khata khel tlem zawk chungin, RC Lens aiin point liin an sang zawk a, mahse match sarih khelh tur an la neih avangin chet sual theihna chance a la awm.