Mizoram MMA Championship-ah SPES ropui ber; Mizoram State Mixed Martial Arts Association (MISMA)

buatsaiha neih, Mizoram State MMA championship 2026 vawi 10-na chu April 16, Ningani zan khan khelh zawh a ni ta a, a pumpuiah SPES Martial Arts Academy (Dawrpui Contact Sports) chu team champion an ni.

April 14 aṭanga neih ṭan inelnaah hian district pariat aṭangin fighter 100 vel an inlan a, SPES Martial Arts Academy tluk zo an awm lo–anni hian a pumpuiah gold medal 17 lain, silver medal pasarih an hawn tel bawk.

PMS MMA Academy chu pahnihna niin, anni hian gold pathum an hlawh chhuak thei a, silver medal pathum an hawn tel bawk. Elite MMA & Fitness Gym chuan gold pahnih lain pathumna an ni a, silver medal pahnih leh bronze medal pakhat an la tel.

MMA India, national federation hriatpuinaa neih inelnaah hian kum 10-17 inkar tan pawh inelna buatsaih niin, youth amateur rules him tak hnuaiah inelna hi an hmachhawn.

Kum 18 chin inelna hi medical fitness test leh thisen test pal tlang thlapa neih niin, inelnaa che ṭha zual fighter-te chu kum danga an lo tih ṭhin tawh angin national championship-ah inlanin, MISMA-in a sponsor leh dawn a ni.

MISMA chuan an fighter ṭhate chu professional fighter nih thlenga chher chhoh zel an tum thu an sawi a, MISMA general secretary Samuel Lalrozama chuan, "MISMA chhuak pro fighter 10 chuang kan nei tawh," tiin Vanglaini a hrilh a, kuminah hian pro fighter thar pathum Lalnunsanga, Lalnunmawia leh Vanlaldingngheta te an nei.

MISMA chhuak zingah Nazareth Lalṭhazuala chuan professional fight vawi sarih nei tawhin, a la chak vek a, khawvel huap pawha lar phak One Championship-ah vawi hnih inlanin, a chak ve ve.

April 3 khan MISMA chhuak tho Zarmawia chuan One Championship hnuaia a match hmasa ber khelin, ani erawh Taiga Orii lakah a tlawm a, One-a a inlan hma hian professional fight vawi li neiin a chak vek thung.