ISL-ah goal ruk leh red card

Ningani zan ISL inkhel a 'hot' hle–East Bengal chuan Bengaluru mikhualin, team pahnih hi 3-3 in an inhnehtawk a, red card pakhat phawrh a ni bawk.

Kolkata khawpuia inkhelah Ashique Kuruniyan chuan Bengaluru tan goal hmahruai khungin, minute 21-naah Anwar Ali chuan East Bengal tan overhead kick hmangin si phurh a sut.

Mahse, East Bengal an buai zui–si phurh an sut aṭanga minute thumnaah Miguel Figueira chuan ṭul lo takin ball a pet lui a, buaina a chhuak zui. Miguel hi red card pek a ni a, player kim loin East Bengal an khelh phah.

Bengaluru tan Suresh Singh-a'n hmahruaina goal khung zuiin, 2-1 a ni. Mahse, Kolkata club an beidawng duh lo–minute 55-naah Saul Crespo hmangin si phurh an sut leh a, 2-2 a ni.

Mahse, Ryan Williams hmangin Bengaluru-in a vawi thum nan hma an hruai a, 3-2 a ni. An chak mai dawn nia a lan tawh tawh hnu, hun pek belhah East Bengal chuan Anton Soijberg hmanga khung lehin, goal dang luhna hun a awm tawh lo a, 3-3 in inkhel a tawp.

East Bengal tan Edmund Lalrindika'n inkhel bul ṭanin, Bengaluru tan bench aṭangin Lalremtluanga Fanai a lut thung–Bangalore club hian coach Renedy Singh ho khan match sarih aṭangin vawi li hnehna changin, vawi hnih draw leh vawi khat chiah tlawm an nei.

Renedy duhkhawp loin Spanish coach Pep Munoz an la lut a, match hnih a kaihhruai aṭangin point khat chiah an la hlawh chhuak.