Nomawi nena thlah phu Silva

Manchester City captain Bernardo Silva-a'n season tawpah Etihad Stadium a chhuahsan dawn a, Pep Guardiola tan Portuguese midfielder hi thlak a harsa ang. Tun dinhmunah erawh Silva thlakna tur zawn aiin nomawi nena Silva thlah a pawimawh zawk.

Pep Guardiola-a'n City a enkawl hmasak ber season-ah nomawi a chawi lo a, kum 2017 nipui bazarah Bernardo Silva lalutin English football-a hlawhtlinna a chan kawngah Portuguese midfielder hian hmun pawimawh a chang.

Bernardo Silva hian Premier League nomawi paruk, FA Cup pahnih leh League Cup panga a chawi bakah a vawi khat nan City hi Champions League leh Club World Cup-ah a champion pui. Silva pawhin a hlawhtlinna hi a chhuang. Portuguese midfielder chuan, "Season khata point 100, domestic quadruple, treble leh a zawna Premier League nomawi vawi li chawi bakah hlawhtlinna ṭhahnem tak kan chang. A chhe hran lo," tiin a sawi a, City fan a nih reng tur thu a sawi bawk.

Bernardo Silva hian nomawi chawi tam kawngah ropui viau mah se club legend dang Kevin de Bruyne, Sergio Aguero, Vincent Kompany leh David Silva te angin ngaihhlut a hlawh tawk lo. Kum 31 mi tan City tana match 471 aṭanga goal 76 a khung leh assist vawi 77 a neihte hi ropui viau mah se Arsenal laka an tlawm a nih chuan 'ser nung' a nei reng dawn.

Ropui lehzuala Silva-a'n City a chhuahsan theih nan Gunners hneh a pawimawh a; League Cup nomawi an chawi tawh a, Premier League leh FA Cup nomawi nena season an khar a ṭul bawk ang.