Chanmari FC an chak; Aizawl FC khingpui tur Lajong

Indian Football League-ah Chanmari FC-in nimin khan phase 1 khar nan Namdhari FC 4-1 in an sawp a, MPL12 champion hi panganaah awm mah se Champonship Playoff khel turin inkhel dang result an nghah a ṭul thung. Zanin dar 6:30 hian Shillong Lajong-in Aizawl FC an mikhual ang a, Mizo club pakhat zawk hmalam hun a chiang dawn.

C'ship Playoff khel tur chin hriat kim hun erawh April 19, Pathianni tlai dar 4:00-a Dempo SC leh Rajasthan FC inkhelh zawhah a ni ang. Tun dinhmunah Diamond Harbour, Sreenidi Deccan, Rajasthan United leh Shillong Lajong te C'ship Playoff khel turin an dinhmun a chiang tawh a, Namdhari leh Real Kashmir ten relegation playoff an khel dawn tih a chiang tawh thung.

Goal li ngawt

Chanmari FC tan relegation playoff pumpelh turin Namdhari hneh ngei a ṭul a, chak tura an mamawh goal pawh an khung hma. Minute lina lekah Brazilian midfielder Pedro Lucas-a'n goal a khung nghal a, Mizo club-in duhthusama ṭhain bul an ṭan.

Namdhari lamin C'ship playoff khelh beiseina an neih ve tho avangin ṭantu pawh an nei chhe lo a, mah se Mizo club-in inkhel an thunun. Mizo club-in second half-ah Christopher Kamei leh Lalruatsanga te hmangin an khung belh a, darkar khat chhungin 3-0 in hma an hruai hman.

Dipankur Sharma-a'n substitute awmze nei a siam a, KC Malsawmsanga'n amah ang bawka bench aṭanga lut Lalthangliana (AB-a) tan ball ṭha a siamsak a, Tlungvel tlangval AB-a hian chak nemnghehna goal khungin Chanmari 4-1 in an chak.

CFC dal theitu AFC

Round tawp ber khelh hmain C'ship playoff khelh beisei team panga an awm a, heng team-te hian hmunruak pahnih an inchuh. Chanmari hian Namdhari khelh beiseina an titawp a, Dinpankur hote dinhmun chhelo mah se vanduai thei an la ni thung.

Gokulam Kerala, Dempo SC leh Aizawl FC te hian tling tawh vek an hmachhawn dawn a, hei vang hian inkhel result hi a hranpain a pawimawh vek. Dempo SC leh Aizawl FC hi an chak ve ve a nih chuan Chanmari beiseina a tawp dawn a, Gokulam erawh Chanmari chunga awm tur chuan goal thum aia tama chak a ngai dawn.

Aizawl FC hi Chanmari dal thei tuah a ngaih theih a, Mizo club tan hmunruak pakhat a awm ngei turah a ngaih theih thung. R. Lalruatfela hote erawh an fimkhur a ṭul dawn a, Shillong Lajong dah hniam a rem lo. Lajong hian game nung ṭha tak leh team game an khel a, RG Stadium-ah Chanmariin an zuam sual tawh a, Shillong-ah Aizawl FC-in an ze ṭha mi an chhuah a ṭul ang.