Youth National-ah TC-i'n gold a la

Kum 19 hnuai lam inelna 8th Youth Women National Boxing Championship 2026-ah TC Malsawmkimi chuan nimin khan final-ah Services boxer Zinat Smile Shaik chu split decision-a (3-2) hnehin Mizoram tan gold medal a hnek chhuak.

Peter Lalrintluanga leh Vanlalthlamuanpuii te fanu TC-i hi North Vanlaiphai tleirawl a ni a, coach Rochhingpuia hnuaia inzir ṭhin niin tun inelnaah hian Mizo coach C. Vanlalchhuanga, R. Lalbiaksangi, Zochhuanawma Fanai leh Robert Lalnunmawia Hmar ten an hruai a ni.

TC-i hian first round-ah Sunena Akhtara Amin (Assam) unanimous decision-in a hneh a, quarterfinal-ah Goa aiawh Aarna Mishra chu RSC a hnehin semifinal-ah unanimous decision-in Nidhi Lodhi (MP) a hneh leh bawk.

Tun ṭum inelnaah hian Mizoram aiawhin mipa boxer pariat leh hmeichhe boxer pali an tel a, TC-i chauhin medal a hlawh chhuak a.

Serchhip tleirawl Lalngaihawmi'n quarterfinal a thleng bawk. Ngaihawmi hian Tarah Yaram (Arunachal) leh Sharmistha Saha (West Bengal) te hneh mah se quarterfinal-ah Haryana aiawh Gunjan lakah a vanduai zawkah a ṭang.

Mizoram team hi inelna thlengtu Assam Don Bosco University, Sonapur a zirlai leh Mizo awmten an ṭawiawm ṭha ṭhin a, a bik takin OSD to vice chancellor James Famkima chungah Mizoram boxing team te an lawm hle.