Puitea lansarh zanah Odisha chak zo lo

Zirtawpni zan ISL inkhelah Odisha midfielder K. Lalṭhathanga (Puitea) chu player of the match atan thlan a ni a, mahse, Bethlehem Vengthlang tlangval hian a team a chakpui zo lo.

Odisha hian Mohammedan SC mikhualin, VP Suhair chuan mualneitu team tan goal hmahruai a khung - Lalrinfela Khiangte siamsak a ni. Mahse, Kolkata club-in Adison Singh hmangin an chhanglet a, goal dang a luh tawh loh avangin 1-1 in an ṭin.

Isak Vanlalruatfela'n Odisha tan goal khungna remchang nei mah se, a chhawr lo a, Odisha tan hian Vanlalzuidika Chhakchhuak chuan bul a ṭan bawk.

Mohammedan tan Lalremsanga Fanai, Lalngaihsaka leh Lalthankima ten inkhel bul an ṭan a, Joseph Lalmuanawma chu bench aṭangin a lut thung.

Zirtawpni zan inkhel dangah Chennaiyin chuan 1-0 in Sporting Club Delhi an hneh a, Chennaiyin tan Farukh Choudhary chuan inkhela goal awmchhun a khung.

Chennaiyin tan Laldinliana Renthlei chuan inkhel bul ṭanin, bench aṭangin PC Laldinpuia a lut - SC Delhi tan Augustine Lalrochana chuan minute 90 a khel tluan ve bawk.

Hetihlai hian Ashley Westwood an lakluh hnuah Kerala Blasters chuan result duhawm an neih chhunzawm zel - an mikhual Jamshedpur chu 2-0 in an hneh a, English coach an rawih hnuah vawi hnih an chak ta.

Blasters tan first half-ah Nihal Sudheesh leh Vibin Mohanan ten goal khat ve ve an khung a, Men of Steel-in a chhanletna tur an neih loh avangin Blasters an chak.

Kerala club hian Celta Vigo centre back hlui David Català hoin season bul an ṭan a, mahse, league match rukah vawi khat chauh an chak hnuin an ban a, Hong Kong coach hlui Westwood an la lut zui.

Westwood hian a match hmasa berah Blasters tlawmpui mah se, match hnuhnung pathumah an tlawm leh tawh lo - vawi hnih chakin, vawi khat draw an nei.

English coach-in Blasters a enkawl hnuah Freddy Lallawmawma pawhin hmun pawimawh chang leh tawhin, Jamshedpur lakah pawh bul a ṭan a, Jamshedpur tan Lalhriatpuia Chawngthu leh Mark Zothanpuia ten inkhel bul an ṭan bawk.