Lampard-a'n EPL-ah Coventry kirpui

Frank Lampard chuan Coventry City chu season thara Premier League khel turin a hlang kai - Championship hmahruaitu hian Zirtawpni zan khan khualmualah Blackburn Rovers chu 1-1 in an draw a, um phak theih an nih tawh loh avangin EPL khel turin an inpetkai.

Blackburn khelmualah mualneitu team hian Ryoya Morishita hmangin goal hmahruai an khung a, an chak mai dawn niin a lang hman. Mahse, minute 84-naah Bobby Thomas chuan Coventry tan si phurh sut ve lehin, 1-1 in inkhel a tawp a, Premier League khel turin Coventry an tling.

Coventry hi May 2001 khan Premier League aṭangin an relegate a, EPL-ah an kir leh lawk lo a ni mai lo - League One-ah hial an tla thla hman a, administration-ah an awm hman hial bawk.

Coventry hian November 2024 khan Lampard hi an coach thar atan an la lut a, season hmasa khan playoff a hruai thleng. Mahse, semifinal-ah Sunderland ngam loin, an beiseina a tawp.

Tun season-ah erawh playoff khelh ngai loin champion ni ngei chungin an inpetkai a, match thum khelh tur la nei mah se, pahnihna Millwall tan pawh um phak theih an ni tawh lo.