NBA Playoff-ah Lakers an chak nghal

NBA Play-in Tournament khelh zawh a ni tawh a, Playoff Round 1 khelh chhunzawm nghal niin, nimin zing khan Los Angeles Lakers chuan 107-98 in Houston Rockets an hneh nghal a, best of seven series-ah game 1 an la.

Crypto.com Arena-a inkhelah lakers an chungnung zawk a, inhliam avangin Luka Doncic leh Austin Reaves te an la inlan thei lo. Mahse, Lakers guard pahnih hi Luke Kennard-a'n a thlak hneh hle a, Kennard hian point 27 neiin a score hnem ber. Rockets-in Lakers hnaih ve leh ṭhin mah se, Kennard leh Rui Hachimura ten an chhang let thei zel a, Rockets-in an pawt thla thei lo.

Lakers tan veteran LeBron James a khel ṭha bawk a, LeBron hian point 19 neiin rebound pariat leh assist 13 a nei a, triple double a siam teuh hle, Kum 41 mi James hi a kum tam ve deuh tawh mah se, court chhungah a la ṭangkai takzet a, a ṭul hunah point a score theih bakah player naupang zawkte tan hruaitu ṭha a ni a, Lakers chak nan a thawh hlawk hle.

Hetihlai hian Rockets an khel chhe bik lo a, player panga zetin point 10 an score tling a, mahse an vanduai ṭum an tawng fuh a, a tlawm zawkah an ṭang. Rockets tan tawnhriat ngah Kevin Durant chu a khup hliam vangin a khel thei lo a, KD awm lo hi Rockets-in an tuar tih a lang. Mahse, Lakers tan Doncic leh Reaves an inlan bik loh avangin chhuanlam a tling lo thung.