Inter-in champion an hnaih zel

Serie A hmahruaitu Inter Milan chuan Inrinni zan khan 3-0 in Cagliari an hneh a, anmahni hnaih bertu Napoli an chak loh avangin an tan champion kawng a inhawng zau tawh a, an champion ngei pawh a rinawm tawh hle.

Inrinni zan inkhelah hian Inter tan Marcus Thuram, Nicolo Barella leh Piotr Zielinski ten goal khat ṭheuh an khung a, Cagliari-in chhanletna tur an nei ve lo.

San Siro-a inkhelah mualneitu-in ball an chang tam zawk a, chance pawh insiam nghalin Thuram, Federico DiMarco, Carlos Augusto, Pio Esposito leh Denzel Dumfries ten an chance neih an hlah vek a, first half-ah goal a lut lo.

Second half-ah pawh Inter bawkin inkhel an thunun a, minute 52-naah DiMarco cross ṭha tak chu Thuram-a'n hnai tak aṭangin a pet goal a, Inter-in hma an hruai. Thuram hian tun season Serie A bikah goal 11 a khung tling chiah a, DiMarco-a'n assist 15 a nei tling chiah bawk

Inter an phur laklawh a, minute li hnu lawkah Barella-'n buai nuai nuai karah kawh takin a pet goal leh nghal a, an hmahruaina a belhchhah. Hun pek belhah Zielinski-a'n box pawn aṭangin, mawi zetin a hlap goal a, an chak nemnghehna goal a khung.

Serie A-ah match nga chiah khelh tur a awm tawh a, Inter hi anmahni hnaih bertu Napoli chuan Inrinni zan vek khan an mikhual Lazio chu 2-0 a an ngam loh avangin point 12-in an thlau tawh a, Inter tan champion-na chance a sang hle.

Hetihlai hian an coach Cristian Chivu-a'n San Siro-ah a cham dawn tih a tichiang tawh a, Coppa Italia semifinal khel tur an la nih bawk avangin Inter phur vanglai tak a ni.