Mumbai City an tlawm ve ta

Indian Super League-ah Mumbai City an tlawm ve ta - Lallianzuala Chhangte captain-na hnuaia khel Mumbai hian Inrinni zan khan FC Goa chu 2-0 in an ngam lo a, tun season-a an tlawm hmasak ber a ni.

Mumbai hian Goa an tawn hma hian league match riat khelh tawhah tlawm an nei lo a, vawi nga chakin, vawi thum an khingpui an inhnehtawkpui. Mahse, Goa mual an lenluh meuh chuan ngam loh an tawng a, Manolo Marquez-a nauten kut ruakin an lo hawtir.

Goa hian first half-ah Sahil Tavora leh Muhammed Nemil Valiyattil hmangin goal an khung a, hun tawp thlenga goal dang lut tawh loin, an chakpui - Mumbai tan Lianzuala'n chance nei mah se, a hun ṭha neih a chhawr thei lo a, an tlawm.

Mumbai tan LZa bakah Hmingthanmawia Ralte (Valpuia) leh Lalnuntluanga Bawitlung ten inkhel bul an ṭan a, bench aṭangin Zothanpuia a lut - Goa lamah pawh Ayush Chhetri chu midfield-ah a khel tluan a, striker Daniel Lalhlimpuia chu bench aṭangin a lut bawk.

LZa ten hnehna chang zo lo mah se, ISL table chung ber an la luah chhunzawm a, hetihrual hian an dinhmun erawh a derthawng - nizan khan pahnihna Mohun Bagan chuan NorthEast United lenchilhin, an result kan hre hman lo a, Bagan hian an chak chuan Mumbai tlanpelin, table chung ber an luah ang.