Villa hmaah Liverpool naupang an tlawm

FIFA Club World Cup khel tura senior team an zin hlanin Liverpool naupang rualin Carabao Cup quarterfinal an khel a, Aston Villa-in inkhelh an zirtir. 

Villa Park-a inkhelah mualneitu team-in minute 14-na aṭangin goal an khung ṭan a, hun a tawp meuh chuan 5-0 in Villa an chak - kum 2012-13 season hnua League Cup semifinal an luh leh hmasak ber a ni. Reds player-te hi Under 23 coach Neil Critchley hoa inlan a ni a, Jurgen Klopp leh senior player-te erawh nizana CWC semifinal khel turin Qatar lamah an awm thung.

Nizan khan Premier League club langsar dang Everton, Leicester City, Manchester City leh Manchester United an khel a, he thu buatsaih a nih lai hian result kan hre hman lo. 

Liverpool-in starting XI tur hming an puan rualin English football ngaihven tan pawh 'hmelhriat' tia sawi tur an vang pharh a, hetichung hian inkhel bul an ṭan ṭha hle. Premier League hmahruaitu Liverpool player-ten inkhelh chhung zawngin ball an chang tam a, an tawnhriat neih tlemna chu tlarhnung lamah a lang thung. 

Villa tan Conor Hourihane chuan minute 14-naah freekick hmangin goal hmahruai a khung a, Liverpool an tho tawh lo. Ahmed Elmohamady-a ball cross chuan Morgan Boyes perin an lamah a ti lut a, 2-0 a ni. Jonathan Kodjia chuan goal hnih a rawn khung ve leh a, hun pek belha Wesley goal khung chu Villa chak nemghehna a ni tawh. 

Liverpool tana bul ṭan player-te kum chawhrual chu 19.48 a ni a, Reds chanchina an starting XI kum chawhrual naupan ber ṭum a ni - kum thum dawn liam taa an kum chawhruala 21.81 nichunga FA Cup-a Plymouth an hmachhawn 

ṭuma an record chu an khum.

Merseyside club tana inlan player 11 te kha first team tana an khelh tawh zat belhkhawm chu 16 lek a ni a, Villa manager Dean Smith-a'n an league match hnuhnung ber aṭangin player 11 thlak danglam ve bawk mah se an inthlau deuh a ni. 

Reds tan kum 16 mi Harvey Elliott che vel chu hmuhnawm a tling a, Fulham aṭanga Jurgen Klopp-a'n a thlem chhuah player hi hma a sawn zel chuan Reds tan player duhawm a la ni ang. Inkhelh zawhah hian Villa boss Smith leh assistant coach John Terry te chuan Liverpool dressing room an lut a, player naupang rual hi duhsakna an hlan. Reds U23 boss Critchley chuan, "An chungah ka lawm em em a, ka player-te pawhin an hun tawn kha an dam chhung zawngin an hre dawn a ni," tiin a sawi.