Hruaizela'n century a siam!

Ranji Trophy khelh laiah Mizoram tan Lalhruaizela chuan nimin khan Arunachal Pradesh lakah century a siam. Durtlang tlangval hian ball 152 a hmachhawn aṭanga run 124 siamin Mizo player zinga Ranji Trophy-a run 100 siam tling thei hmasa ber a ni.

Buaina vangin Aruna-chal hian an home match khelhna ṭhin pangngaiah an khel thei lo a, Puducherry Siechem Ground, Puducherry-ah inelna hi neih a ni. A ni hmasa berah Arunachal hian wicket riat an hloh. Niminah wicket hnih hloh lehin an target siam zat chu 343 a ni.

Mizoram tan Lalhruai-zela leh Lalhmangaiha ten bul an ṭan a, Chanmarians player hian Mizo tana mellung pawimawh phunin Mizoram chu beiseina a siamsak. Nimin tlai thleng khan Mizoram hian run 368 siamin wicket hnih an hloh tawh a, inkhel hi an la zo hman lo.

Hruaizela hi Mizo player beiseiawm berte zinga mi a ni mek a, tualchhung cricket inelna hrang hrang mai bakah Ranji Trophy an match hmasa zawka Manipur an hmachhawn ṭum pawh khan run vaw chhuak thei ber a ni.

Mizoram manager Lalroṭhuama chuan, "Khua a lum em em a, player tan chuan nisa ringawt pawh tawrh tham a ni. Niminah nilengin kan field a, kan naute an in fit ṭhat bakah thuawih takin Mizoram tan theihtawp an chhuah.

"Player tinin hma an sawn zel a, a bik takin Lalhruaizela hian tun hnaiah hma a sawn zual. Amah lo kaihruai ṭhintu a pa K. Lalzuiliana hnathawh chu a takin amahah hian a lo lang chhuak a ni," tiin Vanglaini a hrilh.