Liverpool-a medical nei Minamino

Red Bull Salzburg winger Takumi Minamino chuan nimin khan Liverpool-ah medical a nei a, ruahman anga engkim a kal tluan chuan Premier League hmahruaitu hi January 1-ah a zawm dawn a ni. 

Kum 24 mi Japan international hi a contract neih lai ang chuan pound maktaduai 7.25-a leichhuah theih a nih tur thu ziah a ni a, Reds tan chuan player thiamna leh theihna enin 'duhthusama tlawm' tia sawi ngam a ni. 

Minamino hian tun season-ah Salzburg tan match 22 khelin goal kua a khungsak tawh a, assist vawi 11 a nei bawk. Champions League group stage-a Liverpool an hmachhawn match hnihah a inlan ve ve a, Anfield-a 4-3 a an tlawmna inkhelah khan goal a khung. 

Japanese forward hian Liverpool hmachhawn tawh mah se UEFA dan thar avangin Champions League-ah Reds jersey hain a la inlan thei dawn tho a ni.