Dortmund leh Leipzig inhnehtawk

Thawhlehni zan Bundesliga inkhelah Borussia Dortmund leh an mikhual RB Leipzig te 3-3 in an inhnehtawk a, he inkhelah hian winger hmuhnawm Jadon Sancho chuan a zawna a match sarih nan goal a khung leh ta.

Dortmund hian Julian Weigl leh Julian Brandt te goal hmangin 2-0 in hma an hruai hman. Mahse, mikhual lamin Timo Werner-a goal hnih hmangin an sut leh a, team pahnih an inkhel tawkin a hmuhnawm hle.

England international Sancho-a'n an goal thumna khungin a team a chak pui ngei dawn niin a lang hman. Ameherawhchu league hmahruaitu Leipzig an tlawm duh bik lo; Patrik Schick chuan an si phurh sut lehin team pahnih hi point khatah an lungawi a ngai.

Kum 19 mi chauh a la ni a, a sulhnu erawh a tamin a hraw tawh hle - Sancho hi khawvel footballer hmuhnawm zingah a tel phak der tawh. Kum 20 tlin hmaa kum khat chhunga Bundesliga goal 15 khung tling thei pathumna a ni.

Goal a khung hnem piah lamah Sancho hi a ṭhiante tan a ṭangkai thei hle, Leipzig laka Julian Brandt goal khung tur pawh kha a siamsak a ni; 2018-19 season aṭanga chhiar ṭanin league bikah chauh pawh assist vawi 23 zet a nei der tawh.

Sancho hian Bundesliga goal 22 a khung der tawh a, kum 19 leh ni 267 mi chauh a la nih avangin German football inelna sanga kum 20 tlin hmaa goal khung hnem pahnih Koppel (24 goals) leh Kai Havertz (24) te a hnaih tawh hle - a khum a nih pawhin a mak lo ang.

Julian Nagelsmann kaihhruaina hnuaiah RB Leipzig-in point an hlawh chhuak zel a, league match 16 khelh tawhah point 34 neiin a chung berah an awm. Pahnihna Borussia Monchengladbach chu nizan khan a inlan a, hnehna an chang a nih chuan point 34 ve bawk an nei ang.

Kum 32 mi Nagelsmann chuan, "Dortmund khelmual aṭanga point khat hlawh chhuah kha a chhe lo. Goal hnih an sut zo a, a hnuah goal kan chhuah leh, chu pawh chu kan sut leh bawk, tluk tawh hnua kan thawh leh dan kha a ropui," a ti.

Pathumna dinhmun luahtu Dortmund manager Lucien Favre chuan, "Ka naute an che rangin kan khel ṭha em em a, point thum kan hmu lo erawh a uiawm hle. Dinhmun ṭha taka din tawh hnua point hloh leh hi chu a uiawm duh takzet a ni," tiin a sawi.