Champion tur a la chiang lo

Manchester City-in Arsenal an hneh chiah khan Pep Guardiola hoten Premier League nomawi an chawi ngei dawna ngaitu an ṭhahnem a, amaherawhchu table thlir chuan Arsenal a chung berah an la awm. City hian April 22, Nilaini zana Burnley an hneh a nih chuan hmahruaitu an ni chauh dawn.

Premier League-ah point a pawimawh ber a, an point hmuh zat a inang a nih chuan goal difference en tur a ni a, hetah pawh an la intluk fo a nih chuan goal khung tam zawk en tur a ni. Tehfung pathuma en hnuah pawh an la intluk a nih chuan tun season-a an inhmachhawn tawhna en tur a ni a, Man City dinhmun a ṭha ta zawk. Emirates Stadium-ah team pahnih 1-1 in an inhnehtawk a, Etihad Stadium-ah Pep-a hote 2-1 in an chak.

Arsenal leh Man City te hi an khelh hmabak an chak vek a nih chuan season tawpah an point hmuh zat a inang dawn a, tun dinhmuna goal difference-a an inthlauhna lah chhuan tham a tling lo. Gunners leh Citizens tan chak ringawt a tawk dawn lo a, goal inkhungsiak a ṭul dawn.