Goal kan khung a ngai - Delap

Champions League khel lo thei dinhmuna ding mek Chelsea chuan zanin dar 12:30 hian league match khel turin Brighton & Hove Albion an lenchilh dawn a, Blues hi an chak zo lo a nih chuan season thara UCL khelh beiseina a tlem sawt ang.

Chelsea hi league match li chu a zawnin an tlawm tawh a, goal riat ngawt chhuahin, goal khat pawh an khung lo thung - hetih chhung hian Paris St-Germain chuan Champions League aṭangin an pet thla bawk.

Blues hian an league match hnuhnung berah inkhel an thunun chungin Manchester United an ngam lo a, vawi 21 shot nei mah se, Michael Carrick-a naute hi 1-0 in an ngam lo.

Chelsea striker Liam Delap chuan, "Chance tam tak kan insiam a, mahse, a goal thei tlat lo a ni. Goal kan khung loh avangin hrehawm kan ti a, mahse, chu kan chetsualna siamṭha theitu pawh keimahni tho kan ni.

"Thawhlehni zanah siamṭha turin hun ṭha kan nei dawn a ni," a ti a, Brighton lakah goal khung a tum ruh hle - Delap ber hian goal khung a harsat a, match 20 zet chu a zawnin goal a khung tawh lo.

Ipswich Town aṭanga pound maktaduai 30-a Chelsea pantu hian tun season-ah Blues tan match 35 khel tawhin, goal hnih chiah a la khung a, striker record atan chuan a ropui lo hle.

Chelsea hian EPL-ah Liverpool leh Tottenham te an la hmachhawn dawn a, an tan Brighton khelmuala hnehna chan a pawimawh dawn a, chance hlah tam chhunzawm a chi loh ang.