A chung berah Bagan an leng

Indian Super League khelh mekah Mohun Bagan chuan table chung ber an luah ta. Kolkata club hian Pathianni zan khan NorthEast United chu 1-0 in an hneh a, Inrinni zana chak lo Mumbai City tlanpelin, table chung ber an luah.

Bagan tan Robinho chuan minute ngana lekah inkhela goal awmchhun a khung a, Kolkata club an chak. Aizawl FC forward hlui Lalrinzuala'n Bagan an hmachhawn hmaa an match hnuhnung berah Highlander tan goal a khung a, coach Juan Pedro Benali-a'n Serchhip striker hi Bagan lakah bul a ṭantir.

Mahse, tun season ISL-a inkhel bul a ṭan hmasak berah Rinzuala'n goal a khung thei lo a, Kolkata club lakah an tlawm - NorthEast United tan Lalbiakdika (BD-a) chu bench aṭangin luhtir a ni a, hun pek belh a nih tawh avangin awmzia a nei phak tawh lo.

Bagan tan player pawimawh Lalengmawia Ralte (Apuia) chu hliam vangin a la inlan thei lo a, Vaivakawn tlangvalin a club hlui hmachhawn thei lo mah se, khualmualah Bagan an chak ta tho a ni.

Sergio Lobera enkawl Bagan hian league match kua an khelh aṭanga point 20 neiin hma an hruai mek a, point 18 neitu Mumbai City-in an dawt - league match li chiah khelh tur a awm tawh a, ISL champion tum inum boruak a 'hot' chho hle.