Vinicius Jr leh Real an inbia

Brazilian forward Vinicius Junior chu a khelh mekna, Real Madrid nen contract thar chungchangah inbiakna an nei a, contract a pawtsei tih chiang taka tarlan awm lo mah se, khawthlang chanchinbuten Vinicius hi Santiago Bernabeu-ah a châmna chance a sang hle niin an tarlang.

Vinicius hian thla 14 daih chiah Real-ah contract a nei tawh a, Real-in thlun ngheh an tum hle. Kumin World Cup atan Vini hi Brazil coach Carlo Ancelotti hnenah in report tura ruahman a ni a, hemi hnu hian Real-a cham tura contract ziak tura beisei a ni.

World Cup ṭan hmain Real chuan Vinicius hi hun rei zawk châm tura contract ziahpui an tum. Los Blancos hian Vinicius-a hlawh beisei hniam lo tak chungchangah harsatna an lo nei tawh ṭhin a, French forward Kylian Mbappe tlukpuia dah an ngam loh avangin an inrem thei lawk lo.

Mahse, tunah chuan Vini leh Real hi an inrem tawh a, contract thar hi a ziak ngei dawn niin khawthlang chanchinbu te chuan an sawi. Vinicius-a contract pawhsei hi Madrid club tan chuan thil lawmawm tak a ni dawn a, Brazilian forward hi season tharah a ṭhat dan bera chhawpchhuah theih an inbeisei hle.

Tun season-ah Real hian beisei an pha lo a, Champions League leh Copa del Rey-ah tla ve ve tawhin, league-ah pawh an hmelma Barcelona chu point kua zetin an pha tawh lo. Zanin dar 1:00-ah Alaves an mikhual dawn a, Barca pawh thlak an tum a nih chuan an chetsual a thiang tawh lo.