PSG an tawlhthlu leh tawh

French champion Paris Saint Germain chuan Pathianni zan khan an mualah 2-1 in Lyon an hneh lo a, anmahni hnaih bertu RC Lens nen an inthlauhna a zim sawt a, Ligue 1 champion tur a la chiang lo zel.

Parc des Princes-a inkhelah mikhual team an hlauhawm hmasa a, minute rukna lehkah Afonso Moreira ball pek ṭha zet chu Endrick-a'n kawh zetin a pet goal nghal a, PSG an inring hman lo.

Real Madrid aṭanga an hawh Endrick hian Lyon a pan hnuah harhtharna a chang a, inelna hrang hrangah goal sarih a khung tawh a, World Cup-ah Brazil tan a inlan a rinawm a, Lyon a pan fuh hle.

Lyon an phur laklawh a, minute 18-naah counter attack aṭanga nawrin, Moreira-a'n keeper chauh a hmachhawn hnuah tawih takin a pet goal a, an hmahruaina a belhchhah. Lyon hian an chance nei chhunzawm mah se an chhawr ṭangkai thei lo.

PSG vanduaina belhchhah turin Goncalo Ramos-a'n penalty a hlah a, Ousmane Dembele-a'n goal kham a pet per bawk. Hun pek belhah Khvicha Kvaratskhelia-a'n pet goal mah se, an si phurh sut zawh nan hun a awm tawh lo a, khualmualah Lyon an chak.

Luis Enrique hote hian match 28 an khel tawh a, pahnihna Lens aia match khata khel tam zawk chungin point khatin an inthlau. PSG hi Champions League-a Bayern Munich hmachhawn tur an nih avangin, league-a an result ṭha tawk lo hian a nghawg theih avangin an insiamṭhat a ngai dawn.