Suns sawptu Champion lai OKC

NBA playoff round 1 khelh mekah nimin zing khan, champion lai Oklahoma City Thunder chuan 119-84 in Phoenix Suns an hneh a, best of seven series game-ah 1-0 in hma an hruai.

Paycom Center, Okhlahoma City-a inkhelah Thunder an chungnung tluan zak a, MVP ni lai Shai Gilgeous-Alexander-a'n point 25 neiin a score hnem ber a, SGA hian foul vawi 13 zet a hlawhchhuak a, free throw vawi 17-ah vawi 15 a vawm lut bawk. Canadian shooting guard hian MVP nih nawn leh a tum hle.

SGA bakah hian Jalen Williams (22) leh Chet Holmgren (16) te an langsar a, Thunder player te an khel ṭha tlang a, inkhel zingah Nikola Topic chauhin point a nei lo a, nuamsa takin an chak.

Suns tan Devin Booker (23), Dillon Brooks (18) leh Jalen Green te khel chhe lo mah se an ṭhiante puihna an dawng ṭha tawk lo a, OKC an khelh ṭhat zan an tawn fuh bawk avangin an chak zo lo.

OKC leh Suns hi April 23, Ningani zing dar 7-ah an inhmachhawn leh dawn a, OKC hi rinkai zawk an nih bakah champion nawn an tum leh dawn. Mahse, Suns hian an hlau dawn bik lo a, hneh let ngei an tum tawh dawn avangin inkhel hmuhnawm a beisei ngam.