Inkhel hmuhnawmah Villa an chak

Aston Villa chuan season tharah Champions League khelh an tum tih an pholang leh ta - Pathianni zan khan inkhel hmuhnawm bikah Sunderland chu 4-3 in an hneh a, an chakna goal hi hun pek belh minute thumnaa Tammy Abraham-a khung a ni!

Villa Park-a inkhelah mualneitu team tan Ollie Watkins chuan minute hnihna lekah goal hmahruai a khung a, John McGinn-a ball cross chu a tauh lut. Mahse, minute kuanaah Black Cats hian an si phurh sutin, rawlthar duhawm Chris Rigg chuan goal mawi bik a khung.

Kum 18 mi Rigg hi attacking midfielder a ni a, England tana age level-a lo inlan fo tawh player hi chhinchhiah bik a sual lo ang. Rigg leh Sunderland hlim chhung erawh a rei thei bik lo - minute 36-naah Watkins chuan an hmahruai nawnna leh a goal hnihna a khung leh a, World Cup khelh a phuzia a pholang.

Villa hi hahdam tein an chak tawh dawn niin a lang hman a, minute 46-naa Morgan Rogers-a'n a khung belh phei kha chuan 3-1 a ni a, Villa Park-a inkhel an nih bawk avangin Black Cats beiseina a sang lo.

Mahse, season duhawm tak hmangtu Sunderland an beidawng lo. Minute 86-naah Trai Hume-a'n si phurh sut ṭhenin, minute khat hnu lawkah Wilson Isidor-a'n a sut zo der! Hun a tlem tawh a, Villa an hawihai takzet - goal hnih hi Jadon Sancho tihsual aṭanga lut ve ve a ni.

Sunderland hian chakna goal khungna chance an nei zui hial. Mahse, Habib Diarra chuan Villa keeper Emiliano Martinez chauh a hmachhawn chungin a khung thei lo a, mahni hma sial lo hretin, a ṭhianpa Chemsdine Talbi pe ta se, an chak ni mai tur!

Black Cats hian hun ṭha chhawr loh pawizia an tem zui a, hun pek belh minute thumnaah Tammy Abraham chuan chakna goal a khung - Villa an chak a, Premier League table-ah palina nih chhunzawmin, season thara Champions League khel turin an dinhmun a ṭha zel.