Zaninah Martinez khel dawn lo

Coppa Italia semifinal second leg chu zanin aṭangin khelh ṭan a ni leh dawn a, dar 12:30 hian Inter Milan leh Como te an inhmachhawn dawn. Inter tan an captain leh Lautaro Martinez chu a chawnah hliam a neih avangin a inlan ve dawn lo.

Argentine forward hi Roma nen April 5, Pathianni zana an inkhelh ṭumin a inhliam a, Como nen an inkhelh ṭum khan bench-ah ṭhu tawh mah se luhtir a ni lo. Inrinni zana Cagliari an hneh ṭum khan, a dam chian theih loh avangin squad-ah dah a ni lo bawk.

Kum 28 mi hi tun season-ah a che ṭha a, Serie A bikah goal 16 khung tawhin a khung hnem ber a, inelna hrang hrangah goal 20 a khung tawh bawk. Kumina khelh tur World Cup-ah pawh a dam ṭhat chuan Argentina tlarhma rinrawl tur a ni.

Mahse, Martinez hi hliam vangin a buai deuh reng a, 2026-ah phei chuan a la inlan tam lo hle. Team tan goal khung khawl ber a ni a, a hmun ruak hnawh khah a harsa dawn. Zaninah pawh Pio Esposito, Ange-Yoan Bonny leh Marcus Thuram ten a ai an awh leh a ngai dawn.