Bawngkawn an tla, AVS vs Republic

MBOCWWB 8th Inter Village Football Tournament 2026-ah Darlawngin team ṭha zinga mi Bawngkawn 4-2 in an barakhaih. ADFA hnuaia inelna hnuhnung ber champion lai Sihphir Venghlunin champion zia pholangin Phulpui 7-0 in an sawp bawk.

RG Stadium-ah Darlawngin goal hnih khung hmasa mah se Bawngkawnin an chhanglet a, minute 52-naah Lalpekhlua penalty hmangin siphurh an sut zo. Mahse, Peka hi box pawn chiaha freeekick a hlawhchhuah zawhah hnawhchhuah a ni a, Bawngkawnin an tuar. Darlawngin injury time-ah goal hnih an khung a, hnehna an chang.

Sihphir Venghlunin an player pawimawhte an chhawr leh thei tawh a, Phulpui lakah champion zia an pholang. Nomawi humhim thei turin Sihphir Venghlun squad a chhah ṭha a, chutihrualin nomawi chawi turin hmabak a la thui thung.

Vawiin hian inkhel hmuhnawm bik a awm dawn a, Durtlang Playground-ah chawhma dar 11:45 hian Armed Veng South leh Republic Veng te an inkhel dawn. Team ṭha ve ve an ni a, final atana inhmachhawn atan pawha itawm tham an ni. Inkhel dangah College Veng leh Muthi te inhnehtawk viau turah a ngaih theih a, Venghlui leh Zotlang pawh chak tur hriatthiam a har. Team ṭha Lengpui an inlan dawn bawk.