Chona hmachhawn duh Hamilton

Lewis Hamilton chuan Formula 1 huangah driver ṭha an rawn chhuah thar zel thu a sawi a, heng driver ṭha tak tak te nena inelna hautak hmachhawn chu a nuam tih zawng a nih thu a sawi chhuak.

Mercedes driver hian season hmasa khan a vawi ruk nan world title a la a, season thar lo awm turah hian a champion leh a nih chuan driver hlawhtling ber Michael Schumacher-a record a nihrual thei chiah dawn a ni. Britain tlangval Hamil-ton chuan, "Kum tin mai hian thil a thar zel, driver ṭha an rawn chhuak zel a, kan tan pawh hnehna chang tur chuan hmasawn zel a ngai ve bawk.

"Record ropui siam ringawt hi ka thil tum a ni lo tih ka sawi nawn leh duh, kei chuan car intlansiakna sang ber hi nuamti leh ṭha taka hmachhawn zel mai hi ka duh dan leh duhthusam pawh a ni," tiin a sawi. Season liam ta khan Hamilton hian intlansiak vawi 21 a hmachhawn zinga vawi 11 zetah hnehna a chang thei a, atan kum chhinchhiah tlak a ni. Season tharah pawh champion tura rinkai ni chungin a inlan leh ang.

Hamilton leh Sebastian Vettel hi driver inel leh ṭha bik an ni ṭhin a, German driver Vettel pawh hi vawi li ngawt a champion tawh. Mahse, Red Bull car a khalh laia a hlawhtlinna hi Ferrari car a khalh hnuah a la chhawm nung leh thei lo.

Vettel hian a bik takin tun hnai season hnihah tihsual a ngah a, team lam beisei ang a phak loh avangin contract chungchangah pawh inremna kawng an zawh chak lo niin a ngaih theih. Car intlansiakna sang ber Formula 1 season thar hi nakkum March thla aṭangin tlan ṭan leh a ni dawn a, inelna hmasa ber atan Australian Grand Prix tlan a ni ang - intlansiak hi vawi 22 awm tura ruahman a ni.