Kan rilru put hmang a dik - Kane

Bayern Munich forward Harry Kane chuan a khelhpuite chu fakin, an rilru puthmang a dik a tih thu a sawi a, a zawna Bundesliga title an lak leh theihna chhan ber nia a hriat thu a sawi. Bavarians hian Pathianni zan khan VfB Stuttgart lakah 4-2 a hnehna changin, match li khelh tur la awmah an champion tih a chiang tawh.

Champion an nih chian hnuah Kane chuan, an hlawhtlinna chhan ber chu player te rilru vang a nih thu a sawi. Kane chuan, "He season hi kan tan chuan a ropui hle a, hetianga tam goal khung chunga season kan khar thei tur hi player te rilru put hmang dikzia leh chak kan duhzia tilangtu a ni.

"Khelh hmasak ber aṭanga a hnuhnung ber thlengin kan theihtawp kan chhuah dawn a, inelna dang kan la khelh turah pawh kan la ṭang dawn chauh. Kan thawhrimna zawng zawng rah kan hmu a, champion nih leh hi a nuam hle a ni," a ti.

English forawrd Kane hian goal a thun thiam bik a ni tih lantirin, kuminah pawh record ropui tak a nei leh a, Stuttgart lakah a goal thun kha kumin league-a a goal 32-na a ni a, hetiang zat khung tur hian game 27 chauh a mamawh. Inelna hrang hrang chhiar telin, Kane hian match 43-ah goal 51 zet a thun tawh a.

Kum 32 mi Kane hian 2023-a Bayern a zawm aṭangin game 139 khel tawhin, goal 136 leh assist 32 a nei tling tawh a. Kane hi a ṭhianten an thlawp ṭhat bawk avangin Bayern-in kuminah goal 109 zet an thun tawh. Chutihrual chuan tun hnaiah hliam vangin Kane a chawl zeuh zeuh a, Bundesliga season khata goal khung hnem ber Robert Lewandowski (41) record chu a khum a rinawm tawh loh.

Zanin dar 12:15-ah Bayern hian DFB Pokal-ah Leverkusen nen an inhmachhawn dawn a, Vincent Kompany naute tan treble champion ni turin an chak ngei a ngai a, German Cup-ah hian second leg a awm ve dawn loh avangin Bayern tan fimkhur a ngai dawn a, an chak lo a nih chuan treble champion an beiseina a tawp nghal dawn a, Harry Kane-a hoin theihtawp chhuahin an khel ang.