Liverpool-ah Konate a cham dawn

Nipui transfer-a contract hmang zo tur, Real Madrid nena sawizawm hlawh ve reng, Ibrahima Konate chuan Liverpool nen an inrem hnai niin a sawi a, "Anfield-a ka cham chhunzawmna chance a sang hle," a ti.

Kum 26 mi defender hian kum 2021 transfer-ah khan pound maktaduai 35-in Liverpool hi RB Leipzig aṭangin a zawm a, tun nipuiah a contract a hman zawh tawh dawn avangin a duh lam club pan turin zalenna a nei.

Hetiang boruak karah hian Konate hi a chhuak ngei dawn nia sawi a awm a, mahse, France international hian chhuah tumna a nei lo. Konate chuan, "Thu lengvak hi chu a awm reng a, mahse, club nen hian indawrna kan neihna a rei tawh a, kan inrem ṭep tawh a ni.

"Inremna hi ziak fel thuai thei ila kan duh ṭheuh ang, tih ka ring a, buaina engmah a awm tawh rih lo e. Season tharah pawh Reds tan ka khelh zel ka ring a, keipawhin chu chu ka duh ber a ni," a ti a, Kop tan a ngaihṭhat thlak hle.

France centre back chuan sawi zawmin, "Tunah chuan engkim fel hun ka nghak a, chutianga a fel hunah chuan September thla velah khan club sporting director Richard Hughes hnenah hian enge ka sawi in zawt dawn nia," a ti a, chhuah duh anga an sawi ṭhin chu a dik loh thu a sawi.

Konate hian Liverpool tan Premier League match 113 khel tawhin, Premier League, FA Cup leh League Cup-ah a champion pui a, tun season-ah erawh nomawi chawi loin season an khar dawn thung.

Liverpool tlarhnung laia Virgil van Dijk nena inkawp ṭhin Konate chuan, "Liverpool tan chuan season chhe tak a ni a, season tharah chuan kan tihsualte siam ṭha tura theihtawp kan chhuah a ngai dawn a ni.

"He club hi nuam ka ti a, chhungkaw duhawm tak a ni. Ka tan chuan engkima engkim a ni ber mai," a ti. Konate hian a mimal tak pawhin season duhawm lo tak a hmang - January khan a pa chu France-ah a thi a, mahse, hetihlai hian hliam vangin Reds hi tlarhnungah an talbuai a, chawlh pawh nei mumal loin Anfield-ah a kir.

Konate chuan, "Kum harsa tak a ni a, ka chunga thil thleng tam tak hi miin hmu se, he club tana kan inpekzia hi an hmu thiam ang," a ti a, French defender chuan, "Tuna pawimawh ber erawh season tawp atana ngaihtuahna pu chunga, Champions League khelh phak tum hi a ni," a ti bawk.

Liverpool hi Premier League table-ah pangana an ni mek a, season thara UCL khel thei dinhmunah an ding mek.