F1-in dan thar a duang

Formula 1 chuan kumin season aṭanga dan thar hman chungchanga harsatna awmte chingfel turin dan thar engemaw zat a siam leh ta. Dan thar a duan hi sawiselna a nasa a, Chinese Grand Prix zawh hnu lawk khan zirchian a, endik leh tura ruahman a lo ni tawh.

Engine tharah hian khawl pangngai (internal combustion) leh battery (electrical power) hman dan hi 50-50 deuhthaw a nih avangin, lirtheiin chakna thahrui a khawl nan hun an hman tam phah hle. Hei hian driver te thiamna tak tak a hliahkhuh nia hriatna a awm avangin, driver engemaw zat chuan an lungawi lohna an lo lantir tawh.

Lungawi lohna lantir zingah World champion vawi li lai ni tawh Max Verstappen phei chuan, he motor thar hi a duh loh em avangin F1-a a hmalak zel dan tur pawh a ngaihtuah thar hial thu a sawi a. Engine tharin mamawh a ngah ta lutuk chu a lo sawisel tawh.

He engine dan thar an thlak danglamna hian driver te chu qualifying-ah nasa taka an nawr theihna tur leh, intlansiak laia tlan chak zawng inthlau lutuk (speed differential) awm thei lakah a veng dawn a ni.

FIA chuan, "He hmalakna hi motor te chak zawng inthlau lutuk (speed differential) avanga thil hlauhawm tihtlem nan leh, inlehpelna remchang leh motor chakna pangngai tikhaw lo chuang loa siam a ni," a ti.

He speed differential hi driver pakhatin a motor leh battery thahrui zawng zawng a hman lai leh, a dang pakhatin battery thahrui hman tur a neih tawh loh hian a thleng ṭhin a; chutiang hunah chuan 470bhp (horsepower) zet hian an inthlau thei a ni.

He dan thar hian thil tam tak a huam a, season laklawh laia dan thar an hman emaw thlak vawi khatna a ni a, mipui ngaihven a hlawh. Rules thar hi May 1-3 chhunga neih tur Miami Grand Prix-ah hman ṭan tura ruahman a ni hlawm.