Mamardashvili inlan thei rih dawn lo

Season thara Champions League khelh phak tum Liverpool-in chanchin lawmawm lo an nei a, Everton laka 2-1 a an chak ṭuma inhliam, goalkeeper Giorgi Mamardashvili chu kar hnih tal a chawlh a ngai dawn.

Kum 25 mi Mamardashvili hi Everton striker Beto-a'n goal a khung khan an intauh a, a khupah hliam a nei. Damdawi in lamah hruai zui niin, a chhuak leh vat a, mahse, kar hnih aṭanga kar li inkar a chawlh a ngai dawn niin an sawi.

Georgia international hian social media lamah a hliam nat lutuk loh thu tarlangin, "Hliam na tak a ni lo hlauh a, Pathian hnenah lawmthu ka sawi a ni. Min ngaihtuahtu te leh ngaihventute zawng zawng chungah lawmthu ka sawi a, ka lo kir leh thuai ang," a ti.

Liverpool hian hliam vangin number 1 keeper Alisson Becker an la chhawr thei lo a, Everton laka Mamardashvili a inhliam pawh khan third choice keeper Freddie Woodman chu a luh a ngai a, goal a chhuah lo.

Mamardashvili hi kar hnih lek a chawlh ngai pawh ni se, April 25, Inrinni zana Crystal Palace an mikhual hunah a inlan thei dawn lo tihna a ni a, Alisson a la chawlh bawk si avangin Woodman-a'n si ban a nghah mai a ngai dawn niin a lang.

Thil mak ve angreng tak chu, Palace hi Liverpool hian tun season-ah vawi thum tawng tawhin an la tlawm vek! Premier League-a an intawn hmasaka 2-1 a an hneh loh kha an chet chhiat inṭanna tiin a sawi theih a, khatihlai khan Reds hi league match nga a zawnin an chak.

Palace laka an tlawm hnu khan match thum dang a zawnin an tlawm zui a ni. Community Shield-ah team pahnih hi 2-2 in an inhnehtawk a, penalty-ah Palace an chak. League Cup fourth round-ah intawng lehin, Palace hian 3-0 in Reds hi an pet chhuak.

Liverpool-in first choice leh second choice keeper awm lo chungin Palace an hmachhawn zui dawn a, chetsual chance a sang hle! Reds hian league match nga khelh tur an la neihah Palace bakah Manchester United, Chelsea, Aston Villa leh Brentford an hmachhawn dawn a, a awlsam dawn lo.

Hetihrual hian United laka kir hman tumin Alisson a inbuatsaih mek nia sawi a ni a, Liverpool fans tan Brazilian keeper a dam hman theih nan ṭawngṭai a finthlak mai thei!

Liverpool hi EPL table-ah pangana ni mekin, parukna Chelsea aiin point sarihin an sang zawk. Blues hi nizan khan inkhelin, an result kan hre hman lo a, an chak chuan Liverpool nena an inkar hi point li chauh a ni tawh dawn a ni.