Bournemouth coach thar tur Rose

Marco Rose chuan season thar aṭanga Bournemouth enkawl turin Premier League club hi inremna a neihpui a, season thum chhung atan contract a ziak ang.

Cherries hi coach Andoni Iraola chuan season tawpa a chhuahsan tur thu a tichiang tawh a, kum 43 mi coach hian Vitality Stadium-ah a hming chher viau mah se, chona thar hmachhawn a duh tawh niin a lang.

Bournemouth hian an coach a chhuak dawn tih a chian rualin a thlaktu tur an ngaihven nghal a, Rose bakah hian Ipswich Town coach Kieran McKenna leh Rayo Vallecano boss Inigo Perez te pawh an ngaihven.

Mahse, a tawpah chuan German manager Rose la lut turin thutlukna an siam ta. Kum 49 mi coach hi March 2025 khan RB Leipzig chuan an ban a, hemi hnu hian club a nei leh tawh lo - season tharah EPL-ah kan hmu dawn e.

Bournemouth chuan thuchhuah siamin, "AFC Bournemouth chuan Vitality Stadium-ah Marco chu a hna thar, head coach hna thawk turin kan lo lawm a ni," an ti a, tun season a ṭha thei ang bera khar an tum thu an sawi bawk.

Rose hian kum 2012 khan Lokomotive Leipzig aṭanga a coaching career ṭanin, Red Bull Salzburg, Borussia Dortmund, Borussia Monchengladbach leh RB Leipzig te a enkawl tawh.

RB Salzburg hi Austrian Bundesliga nomawi pahnih bakah Austrian Cup a lakpui a, RB Leipzig chu DFB-Pokal leh DFL-Supercup a lakpui bawk.

Tottenham Hotspur pawhin Thomas Frank an ban khan Rose hi an lo ngaihven tawh a, tunah chuan Cherries coach a ni dawn ta zawk.